ವಡೆ ಕೊಡೆ ಬಿಡೆ

ನೀನೊಂದು ಉಬ್ಬಿದ ವಡೆ
ಕೇಳಿದಾಗಲೆಲ್ಲ ನಾ
ಹೇಳುವೆ
ಮನಸ ಕೊಡೆ
ಮನಸ ಕೊಡೆ

ಹೋಗಲಿ ಬಿಡೆ
ನನಗಿಗ
ವಯಸ್ಸಾಯ್ತು
ಬಿಡೆ

ಶ್ರೀಗಂಧ

ದನ ಕಾಯೋಳ ನಡು ಅಂದ
ಹಾಲ ಮಾರೋಳ ದನಿ ಚಂದ
ಹೂ ಮಾರೊಳ ನಗು ಅಂದ
ತರಕಾರಿ ಮಾರೊಳ ಕಣ್ಣೋಟ ಚಂದ

ಮಾತನ್ಯಾಗ ಮುಸರಿ ತಿಕ್ಕೊಕಿ ಚಂದ
ಹಾಡನ್ಯಾಗ ಬಟ್ಟಿ ಒಗಿಯ್ಯಾಕಿ ಚಂದ
ಸಿಡಕನ್ಯಾಗ ಎದುರು ಮನಿಯ್ಯಾಕಿ ಚಂದ
ಇವೇನೂ ಇಲ್ದ ಇರೋ ನಿನ್ಹತ್ರ ನಾ
ಬಾಳೆ ಮಾಡಾಕ ಹತ್ತೀನಂದ್ರ ನಾನ
ಶ್ರೀಗಂಧ

ಮಲಗಿರುವ ಮೋಡ

ಮಲಗಿರುವೇ ಏಕೇ ಮೋಡವಾಗಿ
ಕರಗಿ ಇಳಿದುಬಿಡು ನೀರಾಗಿ
ಕಾಯುತ್ತಿದೆ ಧರೆಯು ಕಾದ ಹಂಚಾಗಿ
ಬೇಡುತಿವೆ ತರುಲತೆಗಳು ಹನಿ ತೊಟ್ಟಿಗಾಗಿ

ಫಸಲೊಳಗಿನ ಹಸಿರಳುತಿರಲು ನೀನಗಾಗಿ
ಕೆರೆಕಟ್ಟೆಗಳು ಕಾಯುತಿರಲು ನಿನ್ನ ಬರುವಿಗಾಗಿ
ಜೀವಿಗಳು ನಲಗುತಿರಲು ನೀರಿಗಾಗಿ
ಹರಿದುಬಿಡು ಶಿವನ ಜಡೆಯಿಂದ ಚಿಲುಮೆಯಾಗಿ

ಹರನೇ ಹರಿಸಿಬಿಡು ಗಂಗೆಯನು ಧರೆಗಾಗಿ
ಮರೆಸು ಮನದ ನೋವನು ಮಳೆಯಾಗಿ
ಸುರಿಸು ಜೀವರಾಶಿಗಳ ಬದುಕಿಗಾಗಿ
ಸತ್ತು ಬಾರದಿರಲಿ ನಿನ್ನ ರುದ್ರಭೂಮಿಗೆ

ಮಾತು ಮೌನ

ಮಾತು ಮರೆವನ್ನು ಹೆಚ್ಚ ಮಾಡ್ತದ
ಮೌನ ಜ್ಞಾನವನ್ನ ಹೆಚ್ಚ ಮಾಡ್ತದ

ಅಮ್ಮನ ಒಡಲು

ಅಮ್ಮಾ ನಿನ್ನ ಒಡಲು
ಇಳೆ ಕಡಲ ತಟಕಿಂತ ತಂಪು

ಮನವಿ

ಹೇಗೆ ದೂಡಲಿ ಇನ್ನುಳಿದ
ದಿನಗಳನು
ಹೇಗೆ ಕಳೆಯಲಿ ನೀ ಬಾರದ
ದಿನಗಳನು

ಯಾಕಿಷ್ಟು ಹಠವು ಈ
ಬಡವನ ಮೇಲೆ
ಯಾಕಿಷ್ಟು ಕೋಪ ಭೂದೇವಿಯ
ಮೇಲೆ

ಕಾಡ ಕಡೆದು ನಾಡ ಕಟ್ಟಿದುದಕೆ
ಕೆರೆಯ ಮರೆಸಿ ಮನೆಯ ಕಟ್ಟಿದುದಕೆ
ಭೂಗಂಗೆಯನು ನೀರರ್ಥಕವಾಗಿ ಹರಿಬಿಡುವದಕೆ
ನಿನ್ನಯ ನೀರನು ಉಳಿಸದೆ ಹಳ್ಳಕೆ ಹರಿಸಿದುದಕೆ

ಮಳೆರಾಯ, ಭೂದೇವಿಯ
ಒಡಲೊಡೆಯ, ಸಕಲ ಜೀವರಾಶಿಗಳ
ಆತ್ಮಜನೆ ಸುರಿದುಬಿಡು ಧೊ ಎಂದು
ಎಲ್ಲರೆದೆಯ ಉರಿಯಾರುವಂತೆ

ಬಿತ್ತಿದ ಬೆಳೆಯ ಉಸಿರಾಗಿಸೋಕೆ
ಮೂಕ ಜೀವಿಗಳ ದಾಹ ತಣಿಸುವದಕೆ
ಧರಣಿಯು ಹಸಿರುಡುಗೆಯ ಹೊಂದುವದಕೆ
ಕೊರಡೊಂದು ಚಿಗುರೊಡೆಯುವದಕೆ

ಹಸಿದೊಡಲ ಮಕ್ಕಳು ಅಮ್ಮಾ....ಎಂದು
ಕೂಗಿದರೆ ಮನೆಯಲಿ ಹಿಡಿ ಹಿಟ್ಟಿಲ್ಲ
ಸೇರು ಅಕ್ಕಿಯಿಲ್ಲ, ಕೊಟ್ಟಿಗೆಯ ದನಗಳು
ಅಂಬಾ... ಎಂದು ಕೂಗಿದರೆ ಹಾಕಲು ಮೇವಿಲ್ಲ
ಕುಡಿಸಲು ನೀರಿಲ್ಲ

ದನಗಳನ್ನಾದರು ಮನಸ್ಸು ಕಲ್ಲು ಮಾಡಿಕೊಂಡು
ಕಟುಕನಿಗೆ ಮಾರಿಬಿಡಬಹುದು, ಮೇವಿಲ್ಲದೆ ಬಾಯಾರಿ
ಸಾಯಲೆಂದು ಗುಡ್ಡದ ತೆಪ್ಪಲಿನಲ್ಲಿ ಬಿಟ್ಟು ಬರಬಹುದು
ಶಿವ್ನೆ  ನನ್ನನ್ನೇ ನಂಬಿ ಬಂದ ನನ್ನ ಮಡದಿ, ಎಷ್ಟೇ

ಕಷ್ಟವಾದರೂ ಸರಿ ಸಾಕುತ್ತೇನೆಂಬ ಭರವಸೆಯಲಿ
ಹಡೆದ ಮಕ್ಕಳನೇನು ಮಾಡಲಿ, ಅವರನ್ನೂ.....?

ನಿನ್ನ ನಾಕು ಹನಿ ಸಾಕೇನಗೆ ಇನ್ನೊಬ್ಬರ
ಹಂಗಲಿ ಬೀಳದಂತೆ, ಯಾರೊಬ್ಬರ ಮುಂದೆ
ಕೈ ಚಾಚದಂತೆ, ಕುಹಕ ಮಂದಿಯ ನಡುವೆ
ಕುಗ್ಗಿ ನಡೆಯದಂತೆ, ನನ್ನೆದೆಯ ಉಸಿರು
ನಿಟ್ಟುಸಿರಾಗುದಂತೆ ತಡೆಯಲು

ನಿನ್ನ ಕೊರಗಲಿ ಮಡದಿ ಮಕ್ಕಳು
ನಾನು ಮಣ್ಣ ಸೇರುವ ಮುನ್ನ
ಇಳಿದು ಬಿಡು ಧರೆಗೆ ಇಲ್ಲವೆ ನಾವೆ
ಸೇರುತ್ತೇವೆ ಮಣ್ಣಿಗೆ

ಇಂತಿ ನಿನ್ನ ದಾರಿ ಕಾಯುತ್ತಿರುವ
ಮಳೆಯಾಕಾಂಕ್ಷಿ

ತುಳಿದರು ನನ್ನ

ತುಳಿದರು ನನ್ನ ತುಳಿಯುತಿಹರೂ
ಇನ್ನೂ ನನ್ನ ಮಡಿಕೆಯ ಮಣ್ಣಿನಂತೆ
ನನ್ನೆದೆಯ ನೋವು ಕೇಳಿಸದೆ
ಬಾಳುತಿರುವಿರಿ ನಾಡಿನಲ್ಲೆ

ನನ್ನುಗಮದ ನೀರು ನನಗಿಲ್ಲ
ಬಾಯಾರಿದ ನನಗೆ ನೀರಿಲ್ಲ
ಹರಿಸುತಿಹರಿ ಯಾಕೋ
ನೋಡುತ ನಿಂತಿಹರೆಲ್ಲ

ಭಾಷೆಯ ಕತ್ತಿಗೆ ದೇಹದ
ಭಾಗವನೇ ಕತ್ತರಿಸುತಿಹರು
ಕಾಣದೆ ಇರುವುದಲ್ಲವಲ್ಲ
ಅರಿತು ಮೌನಿಯಾಗಿರುವಿರೆಲ್ಲ

ನೀಡದೆ ನನಗೊಂದು ಗುರುತು
ಮೂಡವುದೆ ಅಭಿಮಾನದ ಹೆಗ್ಗುರುತು
ಓದದೆ ಬರೆಯದೆ ನನ್ನ ನುಡಿ
ಹಚ್ಚುವಿರೆಂದು ಕನ್ನಡದ ಕಿಡಿ