ಶಾಯರಿ ೩೬೦

ಸಾಕಿ...
ನಿ...
ಸುರಿದ
ಮದ್ಯದಿಂದಲೆ
ಬದುಕುಳಿದಿದೆ
ಈ ಜೀವ...
ಏನು ಮಾಡಲಿ,
ಅನುದಿನವು ಬಿಡದೆ
ಕೊಲ್ಲುತಿದೆ ಅವಳ
ಮೋಸದಾ...
ಭಾವ

ಸಾಕಿ

ಪುಡಿಗಾಸು ಚೆಲ್ಲಿದರೆ...ಅನುಭವಿಸಲಾರದಷ್ಟು
ಸುಖವು ಸಿಗುವುದು ಸಾಕಿ...ನಿನ್ನರಮನೆಯಲ್ಲಿ..
ಝಣಝಣಿಸುವ ಹಣದ ಥೈಲಿಯನ್ನೆ...ಹೊತ್ತು
ತಂದಿರುವೆ, ಹುಡುಕಿದರು... ಮಧುಶಾಲೆಯ ಮೂಲೆ ಮೂಲೆಗಳಲ್ಲಿ ಹಣವನ್ನು ಚೆಲ್ಲಿ, ಹಿಡಿ ಪ್ರೀತಿಯು ದಕ್ಕಲಿಲ್ಲವಲ್ಲ

ಹಚ್ಚಿದ ದೀಪವನಾರಿಸಿ...ಮಲ್ಲಿಗೆಯ ಹರಡಿ, ಹೊಸಕಿ
ಕತ್ತಲಲ್ಲಿಯೆ ಸುಖವನ್ನು ಕಂಡುಕೊಳ್ಳುವರಲ್ಲ..!!!
ಸಾಕಿ...‌ಮದವೇರಿದ ಮಾಂಸದ ಮುದ್ದೆಗಳು..
ಕೈಯಲ್ಲಿ ಸುಡವ ಹಣತೆಯನ್ನೆ ಹಚ್ಚಿಕೊಂಡು
ನಡೆದೆ ಬೆಳಕಿನಲ್ಲಿ.. ತುಳಿದದ್ದು ಮಾತ್ರ
ವಿರಹದ ವಿಷವೇರಿಸುವ ಮುಳ್ಳುಗಳನು

ಶಾಯರಿ ೩೫೧

ದಿನವೊಂದಕೆ ನಕ್ಕು
ಅಸುನೀಗುವ
ಹೂವಿನ ಸಾರ
ನಿನಗೇನು ಗೊತ್ತು
ಸಾಕಿ....
ಕಲ್ಲು ದೇವರಾದರೂ...
ಹೂವಿನ ಸ್ಪರ್ಶವಿಲ್ಲದೆ
ಜೀವಂತಿಕೆಯ
ಹೊಂದವುದೇನು...?

ಶಾಯರಿ ೩೫೦

ಕುಡಿದುಬಿಟ್ಟ
ಖಾಲಿ ಬಟ್ಟಲುಗಳನ್ನು
ತೊಳೆದಿಡಬೇಡ
ಸಾಕಿ...
ಬಿರಿದೆದೆಯ
ಮಾತುಗಳನ್ನೆಲ್ಲ
ಅವುಗಳ ತುಂಬ..
ತುಂಬಿಟ್ಟಿರುವೆ..

ಶಾಯರಿ ೩೪೬

ಸಾವಿಗೂ...
ಸಂಜೀವಿನಿ ಎಂಬ
ಮದ್ದುಂಟು
ಸಾಕಿ...
ಬೆಟ್ಟವ ಹೊತ್ತು
ತರುವಷ್ಟು
ಬಲವು ನನ್ನಲಿಲ್ಲ...
ಅವಳ ನೋವುಗಳ
ಮರೆಸಿಕೊಳ್ಳಲು...
ಕೈಯಲೊಂದು ಮಧು
ಬಟ್ಟಲಿದೆ ಸಾಕಲ್ಲ..

ಶಾಯರಿ ೩೪೫

ಮುಚ್ಚಿಟ್ಟುಬಿಡು...
ಅವಳ ಮದುವೆಯ
ಕರೆಯೋಲೆಯನ್ನು
ಸಾಕಿ...
ಹೃದಯವಿಲ್ಲಿ
ಬಿರುಕುಬಿಟ್ಟಿದೆ,
ಬಂದಿರುವುದು
ನನ್ನ ಮರಣದ
ಆಹ್ವಾನ ಪತ್ರಿಕೆ

ಶಾಯರಿ ೩೪೪

ಎಲ್ಲ ಗ್ರಹಗಳಲ್ಲಿಯೂ
ಶನಿಯೆ....
ತುಂಬಿಕೊಂಡಿರುವನಲ್ಲ
ಸಾಕಿ....
ಸುರಿದುಬಿಡು
ಬಟ್ಟಲು ಮದಿರೆಯನು
ಬಿಕ್ಕುವ ಬಡವನೆದೆಗೆ.
ಆಸೆಯೊಂದನು ಇಟ್ಟುಕೊಳ್ಳದೆ,
ಲೀನವಾಗಿಬಿಡುವೆ
ಪಂಚಭೂತಗಳಲ್ಲಿ