ನಮ್ಮವ್ವ

ಬಣ್ಣ ಬಣ್ಣದ ಸೀರಿ
ನವಿಲು ಚಿತ್ತಾರದ
ರೇಷ್ಮೆ ಸೀರಿ
ಏನ್ಮಾಡ್ಲಿ
ಎದೆ ಮ್ಯಾಲಿನ
ಸೇರಗ ಆಗಲಿಲ್ಲಂದ್ರ
ಏನ ಬಂತ ನಮ್ಮವ್ವ

ಮುತ್ತಿನ ಮೂಗುತಿ
ಹರಳಿನ ಬೆಂಡಾಲಿ
ಜೊಡು ಕೈ ಬಳೆ
ಏನ್ಮಾಡ್ಲಿ
ಹಣಿಮ್ಯಾಲಿ ಹುಡಿ
ಕುಂಕ್ಮನ ಇಲ್ಲಂದ್ರ
ಏನ ಬಂತ ನಮ್ಮವ್ವ

ಊರ್ಗೆ ಸಾವಕಾರ
ಕಾರು ಮೋಟಾರು
ನೆಲಕ್ಕೆ ಮುಟ್ಟದ ಕಾಲು
ಏನ್ಮಾಡ್ಲಿ
ಒಂದ ಹೆಣ್ಣಿಗೆ  ಒಬ್ಬ ಗಂಡ
ಆಗದಿದ್ರ
ಏನ ಬಂತ ನಮ್ಮವ್ವ

ಮಳಿಗೆ ಊರು
ತಂಪಾಗ್ಯೆತಿ
ಕರ್ಲು ಸಂಪಾಗ್ಯೆತಿ
ಏನ್ಮಾಡ್ಲಿ
ಮಡಿಲಾಗ ಒಂದ
ಹಸ ಇಲ್ಲಂದ್ರ
ಯಾರಿಗೆ ಹೇಳ್ಲೆ 
ನಮ್ಮವ್ವ

ಗುಟ್ಟು

ಗುಟ್ಟು ಹೆಂಗಿರ್ಬೆಕಂದ್ರ
ಬಾಗಿಲ ಇಲ್ಲದ
ಮೊಟ್ಟೆ ಹಂಗಿರ್ಬೆಕ
ಬದಾಮಿ ಕಾಯಿಯಷ್ಟ
ಗಟ್ಟಿಯಾಗಿರ್ಬೆಕ
ಭೂಮಿಯೊಳಗಿನ
ಬೆಂಕಿಯಂತಿರಬೇಕ

ಪ್ರತೀಕ

ಕೋಗಿಲೆಯೊಂದು
ಸುಮಧುರವಾಗಿ
ಹಾಡುವುದೊಂದರ
ಪ್ರತೀಕ
ಕೋಗಿಲೆಯೊಂದು
ತಾಯ್ತನದ
ಸವಿಯನನುಭವಿಸದಿರುವುದರೊಂದರ
ಪ್ರತೀಕ

ಇರಬೇಕು

ಅಡುಗೆ ಮಾಡುವನ
ಮನಸ್ಸು ತಿಳಿಯಾಗಿರಬೇಕು
ಅಡುಗೆ ಉಣ್ಣುವನ
ಹೊಟ್ಟೆ ಹಸಿದಿರಬೇಕು 

ಪಾಠ ಮಾಡುವ
ಗುರುವಿಗೆ ಅರಿವಿರಬೇಕು
ಪಾಠ ಕೇಳುವ
ವಿದ್ಯಾರ್ಥಿಗೆ  ದಾಹವಿರಬೇಕು   

ಬೆಲೆ

ಓಲೆಯೇನೊ ಸುಂದರವಾಗಿದೆ
ನಿಜ ಆದರೆ ಅದು ಬಂಗಾರ
ವಾಗಿರ್ಲಿಕ್ಕಂದ್ರ ಏನ ಬೆಲೆ               

ಹೂವೇನೂ ಅಂದವಾಗಿದೆ
ನಿಜ ಆದರೆ ಅದು ಸುಮಾನ
ಬೀರದಿದ್ರೆ ಏನ ಬೆಲೆ   

ಕೆರೆಯೇನೂ ಮೂಕವಿಸ್ಮಿತವಾಗಿದೆ 
ನಿಜ ಆದರೆ ಅದರ ನೀರು
ಕುಡಿಯಲಾಗದಿದ್ರೇನು ಬೆಲೆ 

ನೀನೇನೊ ಜ್ಞಾನಿಯಾಗಿರುವೆ
ನಿಜ ಆದರೆ ನಿನ್ನಲ್ಲಿ
ಮಾನವೀಯತೆಯಿಲ್ಲದಲೇನು ಬೆಲೆ

ದಿನಗಳು

ಪ್ರೀತಿಗೆ ಬಹಳ ದಿನ
ಉಪವಾಸ ಇಡಬಾರ್ದು
ದ್ವೇಷಕ್ಕ ಬಹಳ ದಿನ
ಖೂಳ ಹಾಕಬಾರ್ದು

ನೀತಿಗೆ ಬಹಳ ದಿನ
ಸತಾಯ್ಸಿರಬಾರ್ದು
ಅನ್ಯಾಯಾನ ಬಹಳ ದಿನ
ಸಹಿಸ್ಕೊಬಾರ್ದು

ಹೆಂಡ್ತಿನ ಬಹಳ ದಿನ
ರಮೀಸಬಾರ್ದು
ತಾಯಿನ ಬಹಳ ದಿನ
ನೋಯಿಸಬಾರ್ದು

...ದಿನಗಳು

ಸೋಲಿನ ದಿನಗಳ
ಮರೆಯದೆ ಸೋತೆ
ಗೆಲುವಿನ ದಿನಗಳ
ಉಳಿಸದೆ ಸೋತೆ

ನೋವಿನ ದಿನಗಳ
ಅಳಿಸದೆ ಹೋದೆ
ಹರುಷದ ದಿನಗಳ
ಗಳಿಸದೆ ಹೋದೆ

ದಾರಿದ್ರ್ಯ ದಿನಗಳ
ಕಳಚಲು ಎದ್ದೆ
ಪಾವಿತ್ರ್ಯ ದಿನಗಳ
ಬಳಚಲು ಬಿದ್ದೆ

ಸಾವಿನ ದಿನಗಳ
ಕಹಿಯನು ಅರಿತೆ
ಬದುಕಿನ ದಿನಗಳ
ಸವಿಯನು ಮರೆತೆ