ನಾನು ಅಪ್ಪ ಕಣೋ
ನಿನ್ನವ್ವನ ಹಾಗೆ ಹಾಲುಣಿಸುವನಲ್ಲ
ಅತ್ತರೆ ಜೋಗುಳ ಹಾಡಿ ಮಲಗಿಸುವನಲ್ಲ
ನಡು ರಾತ್ರಿಯ ಒದ್ದೆ ಬಟ್ಟೆಯ ಬದಲಿಸುವನಲ್ಲ
ಎಣ್ಣೆಯ ಹಚ್ಚಿ ಮ್ಯೆಯನು ತಿಕ್ಕಿ ತೊಳೆಯುವನಲ್ಲ
ಅಗುಳಗುಳ ಹಿಚುಕಿ ಉಣಿಸುವನಲ್ಲ
ತೊದಲು ನುಡಿಗಳ ಗುರುವಾಗುವನಲ್ಲ
ನಿನ್ನ ಮನದ ಮಾತುಗಳರಿಯುವ ತಾಯಿ ಮಮತೆಯವನಲ್ಲ
ನೀನಿಲ್ಲದ ಅಂಗಳವ ನೆನೆದು ಕೊರಗುವನಲ್ಲ
ನನಗೆ ಇಷ್ಟು ಮಾತ್ರ ಗೊತ್ತು ನಾನಾಗದ
ನಾನೇರದ, ನಾ ಮುಟ್ಟದ ಗುರಿಗಳನೆಲ್ಲವ
ನಿನ್ನ ರೂಪದಲಿ ಪಡೆಯುವ ಹಂಬಲ
ಅದಕಾಗಿ ಎಷ್ಟೊ ರಾತ್ರಿಗಳನು ಹಗಲಾಗಿಸಿರುವೆ
ಉಡದುಣ್ಣದೆ, ಮಲಗದೆ ನಿನ್ನ ಶಿಖರದ ತುದಿಯ
ಮುಟ್ಟಿಸಲು, ನಿನ್ನ ಹೆತ್ತವಳಾರೆಂದು ಕೇಳುವಂತೆ
ಮಾಡಿ ಅದರಲಿ ನನ್ನ ನಾ ಹುಡುಕುವೆ
ಗೊತ್ತಾ ಮಗನೆ/ ಳೆ
