ನೀನಿಲ್ಲದ ಮನೆ
ನೀರಿಲ್ಲದ ಕೆರೆಗೆ ಬಾಯಾರಿ
ಬಂದ ಹಸುವಿನಂತಾಗಿದೆ
ನೀನಿರದ ಸಂಜೆಗಳು
ಹಿಂಡಿನಿಂದ ಬೇರ್ಪಟ್ಟ ಕಿರುಚುತ
ಹಾರುವ ಗಿಳಿಯಂತಾಗಿದೆ
ನೀನಿರದ ಸಮಯ
ಮುಳ್ಳುಗಳೆ ಇರದ ಗಡಿಯಾರವು
ನಿಂತಿರುವುದೊ ಓಡುತಿರುವುದೊ
ಚಲನೆಯಿಲ್ಲದಂತಾಗಿದೆ
ಮಾತುಗಳಿಲ್ಲದ ಕೋಣೆ
ಬೆಟ್ಟದಲಿ ಸಿಡಿಮದ್ದು ಸಿಡಿದು
ತೆಳೆಯುವ ನಿಶ್ಯಬ್ದದಂತಿದೆ
ಹೆಜ್ಜೆಗಳ ಸದ್ದಿಲದ ವರಾಂಡ
ಕಾಲಿಗೆ ಗೆಜ್ಜೆಯ ಕಟ್ಟದೆ ನರ್ತಿಸುವ
ರಂಗಮಂದಿರದಂತಾಗಿದೆ
ನೀನಿರದ ಈ ಮನ
ಉಸಿರಾಟ ನಿಂತು ಎದೆಯ
ನೆತ್ತರೆಲ್ಲ ಹೆಪ್ಪುಗಟ್ಟಿದಂತಿದೆ
ಸಂಕ್ರಾಂತಿ ಬಂತಂದ ಎಲ್ರೂ
ಸಿಹಿ ಹಂಚತಾರ ಬಾಯಿಗೆ
ಎಳ್ಳು ಬೆಲ್ಲ ತಿನಿಸ್ತಾರ
ಕೇಳವ್ವ
ವರುಷ ಪೂರ್ತಿ ಕೈಯಿಂದ ಹಂಚೊ
ಸಿಹಿನ ಬಾಯಿಂದ ಯಾಕ ಹಂಚೊದಿಲ್ಲೊ
ನಮ್ಮವ್ವ
ದೀಪಾವಳಿ ಬಂತಂದ ಮನಿ ಒಳಗ
ಮನಿ ಹೊರಗ ದೀಪಾ ಬೆಳಗತಾರ
ಕೇಳವ್ವ
ದೇಹಾ ಅನ್ನೊ ಮನಿಯೊಳಗ ಅರಿವು
ಅನ್ನೊ ಜ್ಯೋತಿನ ಯಾಕರ ಹಚ್ಚೊದಿಲ್ಲೊ
ನಮ್ಮವ್ವ
ಹಬ್ಬ ಹಬ್ಬ ಅಂತ್ಹೇಳಿ ಹುಳಿ ಬಿಟ್ಟ ಸಿಹಿ
ಉಣ್ಣಾಕ ಕುಂತಿರ್ತಾರ
ಕೇಳವ್ವ
ಮಂದಿ ಬಾಳೆಕ ಹುಳಿ ಹಿಂಡಾಕ
ತುದಿಗಾಲಿಲೆ ನಿಂತಿರ್ತಾರೊ
ನಮ್ಮವ್ವ
ಬಂದಿದೆ ಸಂಕ್ರಮಣ
ತಂದಿದೆ ಬಾಗಿಲಿಗೆ ನವ ತೋರಣ
ನೇಗಿಲಿಗೆ ಹೆಗಲ ಕೊಟ್ಟ ಬಸವನ
ಪೂಜಿಸುವ ಪುಣ್ಯ ದಿನ
ದವಸ ಧಾನ್ಯಗಳ ನೀಡಿದ
ಭೂತಾಯಿಗೆ ನಮಿಸುವ ದಿನ
ರವಿಯು
ಧನುರ್ ನಿಂದ ಹೊಮ್ಮಿ ಮಕರವ
ಅಪ್ಪುವ ದಿನ
ಸುಡುವ ಧೀರ್ಘ ಹಗಲುಗಳ
ಪ್ರಾರಂಭೊತ್ಸವದ ದಿನ
ಹಸಿ ಹಸಿ ಭೂದೇವಿ ತಳಗಳ
ಫಸಲಿನ ತೆನೆಗಳ ಕಾಳುಗಳು ಗಟ್ಟಿಗೊಳ್ಳಲು
ಆರಂಭದ ದಿನ
ಮೈಗಂಟಿದ ಪಾಪಗಳ ತೊಳೆಯಲು
ತಣ್ಣೀರಿನ ಸ್ನಾನವಗಯ್ಯುವ ದಿನ
ನವ ಜೋಡಿಗಳು ಹಸೆಮಣೆಯೆರಲು
ಮುನ್ನುಡಿ ಬರೆಯವ ದಿನ
ತೀರ್ಥಯಾತ್ರೆಯ ಕೈಗೊಳ್ಳುವವರಿಗೆ
ಶುಭದಿನ
ತಾಯಿ ಗೌರಿ ಶಿವನ ಪಡೆಯಲು
ತಪವ ಪ್ರಾರಂಭಿಸಿದ ಮಹಾದಿನ
ಈ ದಿನ
ವರುಷದುದ್ಧಕೂ ಕೆಟ್ಟ ಮಾತುಗಳನಾಡಿ
ಅವರಿವರ ವಿಷಯಗಳ ಆಡಿ ಆಡಿ ವಿಷದ
ನಾಲಿಗೆಗೆ ಎಳ್ಳು ಬೆಲ್ಲಗಳ ಸವಿಯ ಸವಿಯುವ ದಿನ
ನೋಡಿ ಮಾಡಿ ಬೇರೆಯವರಿಗೂ ಕಲಿಸಿ
ನಿಮ್ಮ ದೇಹಕ್ಕೂ ಮೆತ್ತಿದ ಪಾಪದ ಕಲೆಗಳ
ತಣ್ಣೀರಿನಲಿ ಹರಿಯುವ ಹೊಳೆಯಲಿ
ನಿಮ್ಮೆಲ್ಲರ ಪಾಪವ ಹೊತ್ತು ನಿಲ್ಲುವ
ಕಲ್ಯಾಣಿಗಳಲಿ ಮೈ ತೊಳೆಯುವ ದಿನ
ಯಾವ ದಿನವಾದರೇನೂ ಮನವದು
ಅನುಕ್ಷಣವು ಬೆಳಕ ಬಯಸಿದಿದ್ದರೆ
ಯಾವ ಘಳಿಗೆಯಾದರೇನೂ ಕಾಯವದು
ಕಾಯಕವ ಮಾಡದಿದ್ದರೆ
ಸುಣ್ಣಕ್ಕೆ ಹೆಪ್ಪನು ಹಾಕಿದಂತೆ
ಕಲ್ಲನು ಬೆಣ್ಣೆಯಲಿಟ್ಟು ಕಾಯಿಸಿದಂತೆ
ಶ್ರೀರಾಮನೇ ರಾಜ್ಯ ಆಳಿದ್ರೂ
ಸೀತೆ ಕಾಡಿಗೆ ಹೋಗೊದ ತಪ್ಪಲಿಲ್ಲ
ಸನ್ಯಾಸಿನೆ ದೇಶ ಆಳಿದ್ರೂ
ಹೆಣ್ಣಿನ ಮಾನ ಕಾಯೋರಿಲ್ಲ
ಕೇಳವ್ವ
ಗಂಡ ಷಂಡನಾದ್ರೂ ಹೆಂಡ್ತಿನ
ಹೊಡೆಯೊದ ಬಿಡೊದಿಲ್ಲ
ನಮ್ಮವ್ವ
ಬಾವಿ ಬಾಯಿಗೆ ಹೊಚ್ಚಬೊದು
ಹಂಡೆ ಬಾಯಿ ಮುಚ್ಚಬೊದು
ಚರಗಿ ಬಾಯಿ ಮುಚ್ಚಬೊದು
ಕೇಳವ್ವ
ಲಗಾಮ ಇಲ್ಲದ ಅತ್ತಿ ಬಾಯಿಗೆ
ಏನ ಹಾಕಿ ಮುಚ್ಚಲss
ನಮ್ಮವ್ವ
ವಟಗುಟ್ಟೊ ಹಕ್ಕಿನ ಹಾರಸಬಹುದು
ಗುಂಯ್ಯಗುಟ್ಟೊ ಹುಳನ ಬಡಿಬಹುದು
ಬೀಡ ಬಿಟ್ಟ ಮಂಗ್ಯಾನ ಒಡಿಸಬಹುದು
ಕೇಳವ್ವ
ಮೂರಹೊತ್ತು ತಿಂದುಂಡು ಮದುವಿಲ್ದ
ಕೆಲಸಿಲ್ದ ನಾದ್ನಿಯರ ಕೊಡೊ ಕಾಟಕ್ಕ
ಏನ ಮಾಡ್ಲೇ
ನಮ್ಮವ್ವ
ಹಸಿರಿದ್ದ ಬದುನ ದನ ಬಿಡಾಂಗಿಲ್ಲ
ಕೇಸರಿದ್ದ ಕೆರಿನ ಎಮ್ಮಿ ಬಿಡಂಗಿಲ್ಲ
ಹಾದಿ ಹೊಲದನ ಫಸಲನ್ನ ಹೋಗೊರ
ಬರೋರ ಬಿಡಂಗಿಲ್ಲ
ಕೇಳವ್ವ
ಹಬ್ಬಕ್ಕ ತವರಿಗೆ ಹೊಂಡತಿನಂದ್ರ
ನನ್ನ ದ್ಯಾವ್ರು ಸೀರಿ ಸೆರಗ ಬಿಡವಲ್ರ
ನಮ್ಮವ್ವ
ಬಂಗಾರ ಎಷ್ಟ ದಿನ ನೀರಾಗಿದ್ರೂ
ತುಕ್ಕ ಹಿಡಿಯಾಂಗಿಲ್ಲ
ಕಬ್ಬಿಣನಾ ಎಷ್ಟ ಬಿಸಲಿಗೆ ಇಟ್ರುನೂ
ಅದು ಕರಗಂಗಿಲ್ಲ
ಕೇಳವ್ವ
ತವರನ್ಯಾಗ ಎಷ್ಟ ದಿನ ನಾನಿದ್ರೂ
ಅವರ ನನ್ನ ಮರೆಯಂಗಿಲ್ಲ
ನಮ್ಮವ್ವ
ಅಮಾಸಿ ಹಿಂದ ಹುಣ್ಣಿಮೆ ಬರತೈತಿ
ಹುಚ್ಚಯ್ಯದ ಹಿಂದ ತೇರ ಎಳಿತಾರ
ಹಸು ಹಿಂದ ಕರು ಒಡತೈತಿ
ಕೇಳವ್ವ
ನಾನಿಲ್ದ ಮೂರ ದಿನಕ ನನ್ನ ಕರೆಯಾಕ
ಬಂದಾರ ನೋಡ
ನಮ್ಮವ್ವ
ನಮ್ಮ ಹೊಲದಾಗಿನ ಮುಳ್ಳು
ನಮ್ಮ ಅಂಗಾಲಿಗೆ ಚುಚ್ಚತಾವು
ಕೇಳವ್ವ
ಮನದಾಗ ಇರವ್ನ ಮನಸಿಗೆ
ಚುಚ್ಚುವಂಗ ಮಾತಾಡ್ತಾನೊ
ನಮ್ಮವ್ವ
ಗುಲಾಬಿ ಹೂ ಹರಿಯಾಕ ಹೋದ್ರ
ಮೊದಲ ಅದರ ಮುಳ್ಳ ಚುಚ್ಚತಾವು
ಕೇಳವ್ವ
ಗಂಡನ್ನವಂಗ ಮಾತಾಡ್ಸಾಕ ಹೋದರ
ಬರೀ ಚುಚ್ಚ ಮಾತ ಮಾತಾಡ್ತಾನೊ
ನಮ್ಮವ್ವ
ಹೊಲದ ಬದುವಿಗೆ ದನ ಬರಬಾರ್ದಂತ
ಜಾಲಿ ಗಿಡದ ಬೇಲಿ ಹಾಕ್ತಾರ
ಕೇಳವ್ವ
ಬರೆ ಹೊಲಸ ಮಾತಾಡೊ ಇವನ ಬಾಯಿಗೆ
ಯಾವ ಹೊಲಿಗಿ ಹಾಕ್ತಾರೊ
ನಮ್ಮವ್ವ
ಬೆಳ್ಳ ಬೆಳ್ಳನೆ ಮಲ್ಲಿಗೆ
ದುಂಡು ದುಂಡನಾ ಮಲ್ಲಿಗೆ
ಏಳು ಸುತ್ತಿನ ಮಲ್ಲಿಗೆ
ಜಡೆತುಂಬಾ ಮುಡಿಸವ್ನೆ
ನೋಡವ್ವ
ನಾಕು ತಿರುವಿನ ಜಿಲೆಬಿಯ
ತಂದಾನ ಬಾಯ್ತುಂಬ ತಿನಿಸ್ಯಾನ
ಮುಖದ ತುಂಬ ನಾಚಿಕಿನ
ತುಂಬಸ್ಯಾನ
ನಮ್ಮವ್ವ
ಹಚ್ಚ ಹಸಿರಿನ ಇಲಕಲ್ ಸೀರೆ
ಚಕ್ಕ ಚೌಕ ಖಾನಿಯ ಸೀರೆ
ಮೈತುಂಬ ಉಡಿಸ್ಯಾನ
ನೋಡವ್ವ
ನಲವತ್ತು ಗುಂಡಿನ ಬಂಗಾರದ
ಸರ ಹಾಕ್ಯಾನ
ಕೆನ್ನಿಗೆ ಮುತ್ತಿನ ಮುದ್ರೆನ ಒತ್ಯಾನ
ನಮ್ಮವ್ವ
ಊರ ಊರ ಸುತ್ತಸ್ಯಾನ
ಮಂದಿ ಮಕ್ಳ ತೋರಸ್ಯಾನ
ಮಾತ ಮಾತಿಗೂ ನಗಸ್ತಾನ
ನೋಡವ್ವ
ಜಾತ್ರೆನ ಜೋಕಾಲಿ ಹತ್ತಸ್ಯಾನ
ಬತ್ತಾಸು ಬೆಂಡು ಕೊಡಸ್ಯಾನ
ವರುಸ ತುಂಬುದರೊಳಗ
ಉಡಿಯಾಗ ಕುಡಿ ಹಾಕ್ಯಾನೊ
ನಮ್ಮವ್ವ
