ಚುಟುಕು

ಬೇಕಿದ್ದರೆ, ಮರಗಟ್ಟಿಸುವ 

ಮಂಜು ಗಡ್ಡೆಯಂತಹ 

ಮೌನವನ್ನಾದರು ಸಹಿಸಿಕೊಂಡೇನು.

ತಾಳಿಕೊಳ್ಳಲಿ ಹೇಗೆ?

ಜಿಂಕೆ ಕಣ್ಣುಗಳಿಂದಲೆ, ಎದೆ

ಇರಿಯುವ ಈ... ಹರಿತವಾದ

ನೋಟದ ಭಾವವನು.

ಶಾಯರಿ

ಹಗಲಿನಲ್ಲಿ ಕೊಟ್ಡ

ಮುತ್ತಿನ ಸರವನ್ನು

ಹರಿದು ಹಾಕಿ ನಡೆದುಬಿಟ್ಟಳಲ್ಲ

ಸಾಕಿ...

ಈರುಳಿನಲ್ಲಿ ಕೊಟ್ಡ

ಮುತ್ತುಗಳ ಲೆಕ್ಕವನ್ನು

ಯಾರಲ್ಲಿ ಕೇಳಿಲಿ.

ಶಾಯರಿ

ಹೀಗೆ...

ಬರೆಯುತ್ತಾ ಹೋಗು

ಓದುತ್ತಾ ಹಿಂದೆ ಹಿಂದೆಯೆ

ಬರುವೆನೆಂದಿದ್ದಳು

ಸಾಕಿ...

ಕ್ಷಣ ಅನುಮಾನಿಸಿಯಾದರು

ಹಿಂತಿರುಗಿ ನೋಡಿರಲಿಲ್ಲ!

ನೋಡಿದ್ದರೆ ಚೆಂದವಿತ್ತೇನೊ?

ಶಾಯರಿ

ರಂಗೀ... ಹಳಸಿದ

ಅನ್ಮವನ್ನೆ ಮತ್ತೆ...ಮತ್ತೆ..

ಕಾಯಿಸಿ, ಬಿಸಿಮಾಡಿ

ಕೊಟ್ಟಳು! ಊಟ ಮಾಡಿದೆ

ಅಜೀರ್ಣವಾಗಲೆ ಇಲ್ಲ!!

ಆದದ್ದು ರಕ್ತ ವಾಂತಿ

ಸಾಕಿ...

ವಿರಹದ ಹಾಲಾಹಲವನ್ನೆ

ಬಡಿಸಿಬಿಟ್ಟಿದ್ದಳಲ್ಲ!!

ಹಾಲಿನಂತ ನಗುವನ್ನು

ಚೆಲ್ಲಿ

ಶಾಯರಿ

ಬದುಕು ರಂಗೀಯ ಪಾಲಾಯಿತು.

ಒಲವು ಬೀದಿಯ ಪಾಲಾಯಿತು.

ಧನಕನಕವೆಲ್ಲ ನಿನ್ನ ತಿಜೋರಿಯ 

ಪಾಲಾಯಿತು

ಸಾಕಿ...

ನನ್ನ ಪಾಲಿಗೀಗ, ಬಂಧುಗಳಿಲ್ಲ

ಗೆಳೆಯರಿಲ್ಲ, ಕೊನೆಕೊನೆಗೂ

ನೀನು ಇಲ್ಲ!! ಮಸಣದಲ್ಲಾದರೂ

ಇದೇಯೋ ಗೋರಿಯ 

ಪಾಲು.

ಶಾಯರಿ

ಮಧು ಬಟ್ಟಲಿಗೆ

ಅಳತೆ ಮಾಡಿ ಹಾಕಿದ

ಹಾಗೆ, ನನ್ನೆದೆಯ

ದುಃಖವನ್ನು ಹೇಗೆ? ತೂಗಿ

ತೋರಿಸಲಿ

ಸಾಕಿ...

ಕಡಿಮೆಯಾದ ಮದ್ಯಕ್ಕೆ

ನೀರನ್ನಾದರು ಬೆರಸಿ

ಕುಡಿಯಬಹುದು!

ಕಡಿಮೆಯೇ...ಯಾಗದ

ದುಃಖಕ್ಕೆ!!

ಶಾಯರಿ

ಹಾಕಿದ ಕಣ್ಣೀರನ್ನು

ಕೂಡಿಟ್ಟಿಲ್ಲ!

ಕುಡಿದ ಮದ್ಯದ

ಬಟ್ಟಲುಗಳನ್ನು ಲೆಕ್ಕವಿಟ್ಟಿಲ್ಲ

ಸಾಕಿ....

ಕಣ್ಣೀರನ್ನು ಹಾಕದಿದ್ದರೆ!

ಮದ್ಯ ಸೇರುವುದಿಲ್ಲ,

ಮದ್ಯವನ್ನು ಬಿಟ್ಟುಬಿಟ್ಟರೆ

ಕಣ್ಣೀರೆ ಬರುವುದಿಲ್ಲ!

ಯಾವುದನ್ನು ಉಳಿಸಿಕೊಳ್ಳಲಿ

ಯಾವುದನ್ನು ಕಳೆದುಕೊಳ್ಳಲಿ.