ರಂಗೀ

ಕತ್ತಲೊಳಗಿನ,
ನೆನಪಿನೆದಿರುಗಳಲ್ಲಿ
ಬೆತ್ತಲಾಗುವುದಕ್ಕೆ
ಇನ್ನೇನುಳಿದಿದೆ
ರಂಗೀ.....
ಮಧು ದಾಸನಿಗೆ
ಈಗ, ಜಗದ
ನೈತಿಕತೆಯ ಪಾಠದ
ಅವಶ್ಯಕತೆ.....
ಇದೆಯಾ?

ಚುಟುಕು

ಗೆಳತಿ....
ನಿನ್ನ ಮೌನಕ್ಕೆ
ನನ್ನೆದೆಯಲ್ಲಿ
ಉತ್ತರವಿದೆ!!!

ನಿನಗಿನ್ನು ಕೇಳಿಸುತ್ತಿಲ್ಲ,
ನನಗೆ ಗೊತ್ತು....
ನಿನ್ನೆದೆಯ ಬಾಗಿಲಿನ್ನು
ತೆರೆದಿಲ್ಲ!!!

ರಂಗೀ

ಅವಳ ಮಾದಕ
ಕಣ್ಣೋಟ....
ನೈತಿಕವೋ?
ಅನೈತಿಕವೋ?
ಹೇಗೆ ಅರ್ಥೈಸಿಕೊಳ್ಳಲಿ
ರಂಗೀ....
ಹಾದಿ ತಪ್ಪಿಬಿಟ್ಟಿದ್ದೇನೆ,
ಸರಿ ಯಾವುದೆಂಬುದನ್ನೆ
ಮರೆಸಿಬಿಟ್ಟಿದೆ ಅವಳ
ನೋಟದ ನಶೆ.

ರಂಗೀ

ಅವು ಕಪ್ಪು
ಮಚ್ಚೆಗಳಲ್ಲ,
ಮತ್ತೇರಿ, ಕತ್ತಲಿನಲ್ಲಿ
ನಿ ಕೊಟ್ಟ.‌‌.. ಗುರುತುಗಳವು
ರಂಗೀ...
ಒಲವಿತ್ತು ನಿ
ಕಚ್ಚಿದ್ದಾಗ!!
ವಿಷವೇರಿ ಕಪ್ಪಾಗಿಬಿಟ್ಟಿವೆ
ಈಗ,
ವಿರಹದ ಬಿಸಿಯನ್ನು
ತಾಳಲಾಗದೆ!!

ರಂಗೀ...

ನನ್ನ ಹೃದಯವೆ
ಸಿಡಿದು ಹೋಗಿದೆ
ರಂಗೀ...
ಒಡೆದು ಹೋದ
ಮದಿರೆ ಬಟ್ಟಲುಗಳು
ಇನ್ನಾವ ಲೆಕ್ಕ!!
ಒಂದು ಕಾಣಿಸದು,
ಇದು ಕಾಣಿಸುತ್ತದೆ
ಅಷ್ಟೇ ವ್ಯತ್ಯಾಸ.

ರಂಗೀ..

ನನ್ನ ಜೋಳಿಗೆಗೆ
ಸುರಿದ, ಒಂದೊಂದು
ಕನಸುಗಳು...
ಮೊದಲೆ ಅಸುನೀಗಿದ್ದವಲ್ಲ
ರಂಗೀ....
ಹಾಕಿದ್ದು
ಪ್ರೀತಿಯಿಂದಲೋ?
ದ್ವೇಷದಿಂದಲೊ?

ರಂಗೀ....ಕಜಲ್

ನೀನೂ.....ಹೀಗೆ ಬೆನ್ನ ತೋರಿಸಿ ನಿಂತುಬಿಟ್ಟರೆ
ಹೇಗೆ ರಂಗೀ.....
ಬಿಟ್ಟು ಹೋದವಳು ಅವಳು, ನಿನೇಕೆ ಮುನಿಸಿಕೊಂಡಿರುವೆ.
ಹೆಣವಾದರೆ, ಹೊರಲು ನಾಲ್ಕು ಭುಜಗಳು ಇಲ್ಲ,ಹೊರಗಲ್ಲಿ... ನಾ ತಿರುಗಿದ ಗಲ್ಲಿ..ಗಲ್ಲಿಗಳನ್ನು ತೊಳೆದು, ಬಣ್ಣವ ಬಳಿಯುತಿಹರು ಮತ್ತೆ ಹೊಸದಾಗಿ, ಪೀಡೆ ತೊಲಗಿತೆಂದು.

ಸಾಗರದ ಒಡಲಲ್ಲಿ, ಜಾರಿಬಿದ್ದ ಮಳೆ ಹನಿ ನಾನೀಗ,
ನಿನ್ನೆದುರು ಮನಸಾರೆ ಅತ್ತುಬಿಡಲು ನಾಚಿಕೆಯಾಗುತ್ತಿದೆ
ರಂಗೀ.......
ಬಿಗಿಯಾಗಿ ಎದೆಗಪ್ಪಿಕೊಂಡು ಬಿಡು ನನ್ನನು, ಆಟದಲಿ ಸೋತು, ಅಳುತ್ತಾ ಬಂದ ಮಗುವ ಸಂತೈಸುವಂತೆ....
ಹಣೆಗೊಂದು ಹೂ ಮುತ್ತನಿಟ್ಟು, ನೆವರಿಸಿಬಿಡು ತಲೆಯ
ಮೇಲೆ, ನಾನಿರುವೇನು ಬಿಡು ಎಂಬ ಭರವಸೆಯೊಂದಿಗೆ.

ನನ್ನ ಪಾಲಿಗೆ ಜಗವೆಲ್ಲ ಮೌನ, ಸುಖದುಃಖಗಳೆರಡಕ್ಕೂ
ಕಿಟಕಿ ಬಾಗಿಲುಗಳಿಲ್ಲ ರಂಗೀ.....
ಹೂವೆಂದುಕೊಂಡು ಸೋತು ಹೋಗಿದ್ದೆನವಳಿಗೆ, ಕಲ್ಲಾಗಿಬಿಟ್ಟಳು!!! ನಂಬಿಬಿಟ್ಟಿದ್ದೆ, ಎಷ್ಟೆಂದರೆ....
ಮೋಸ ಮಾಡಿದಾಗ, ಅರಗಿಸಿಕೊಳ್ಳಲಾಗದೆ ದೇಹಕ್ಕೆ
ಬೆಂಕಿಯನ್ನೆ.... ಹಚ್ಚಿಕೊಂಡು ಉರಿದು ಹೋಗುವಷ್ಟು....

ಇಲ್ಲಿ.....ಸಾವನ್ನು ಕೂಗಿ...ಕೂಗಿ...ಕರೆಯುತ್ತಿರುವವನು
ನಾನೊಬ್ಬನೇನಾ? ರಂಗೀ....
ಬದುಕಬೇಕೆಂದು ಪುಣ್ಯ ಮಣ್ಣುಗಳಿಗೆ ಹೋಗಿ
ಬಂದವರು... ಕಣ್ಮುಂದೆಯೆ ಮಣ್ಣಾಗುತಿರುವರಲ್ಲ!!!
ಅದಕ್ಕೇನು ಕುರುಡಾ? ನಾನದರ ಕಣ್ಣಿಗೆ ಕಾಣುತ್ತಿಲ್ಲವಾ?
ಅದೇನು ಕಿವುಡಾ? ಗಂಟಲು ಹರಿದು ಹೋಗುವ ಹಾಗೆ
ಕಿರುಚಿಕೊಂಡರು ಇತ್ತ ತಲೆಯನ್ನು ಹಾಕುತ್ತಿಲ್ಲವಲ್ಲ!!

ನಾನೊಬ್ಬ..... ಪ್ರೇಮದ ಬಳ್ಳಿಯಿಂದ ಒಣಗಿ, ಉದುರಿಬಿದ್ದ
ಹೂವಿನಂತವನು.... ರಂಗೀ...
ಹೂವು ಪಾರಿಜಾತವೆ ಆದರೇನು? ದೇವರ ನೆತ್ತಿಯ ಮೇಲೆ
ಒಣಗಿದ ಮೇಲೆ, ತೆಗೆದು ಕಸಕ್ಕೆ ಎಸೆಯುವುದಿಲ್ಲವೇನು?
ಪ್ರೇಮಿಯೆಂದು ಪೂಜಿಸಿದ ಜನರೇ...ಇಂದು... ವಿರಹಿಯೆಂದು
ಬೀದಿಗೆಸೆದಿದ್ದಾರೆ....
ನೀನೂ.... ಹೊರಹಾಕಿದರೆ, ಹೋಗುವುದಾದರು ಇನ್ನೇಲ್ಲಿಗೆ? ಮಸಣವೊಂದನ್ನು ಬಿಟ್ಟು!!!

ಚುಟುಕು

ಎಷ್ಟೊಂದು
ಮಾತನಾಡುತ್ತವೆ
ನಿನ್ನ ಕಂಗಳು!!
ಸುಡುತ್ತಿದೆ ಈ
ಹೊತ್ತು...
ತುಂಬು ಚಂದಿರನ
ಬೆಳದಿಂಗಳು!!

ಪಾಗಲ್

ಸೂರು... ಊರನ್ನು ಬಿಟ್ಟು ನಡೆದವಳನ್ನು
ಗಲ್ಲಿ ಗಲ್ಲಿಗಳಲ್ಲಿ ಏಕೆ ಹುಡುಕುವೆ ಪಾಗಲ್....
ಅರ್ಧಕ್ಕೆ ನಿಂತುಹೋದ ನಿನ್ನ ಪ್ರೇಮ ಕಥೆ.....ನಾಗರೀಕ
ಜನರ ಬಾಯಿಗೀಗದು ಹೋಳಿಗೆ,
ನಿನ್ನವಳೆಂದುಕೊಂಡವಳು ಮಧುಮಂಚವನು
ಏರಿರಬೇಕಲ್ಲವೆ ಇಷ್ಟೊತ್ತಿಗೆ!!!

ಗೊತ್ತಿದ್ದು... ಕಿವುಡರಾಗಿ ನಿಂತವರ ಮಧ್ಯದಲ್ಲಿ
ಅವಳ್ಹೆಸರ ಕೂಗಿ...ಕೂಗಿ...ಎದುರುಸಿರ ಬಿಡಬೇಡ ಪಾಗಲ್...
ಬಾಯಾರಿ, ನಡು ಬೀದಿಯಲ್ಲಿ ಬಿದ್ದರೂ.... ಕಣ್ತೆರೆಯದ
ಜನರಿಹರಲ್ಲಿ, ಬಂದುಬಿಡು ನೀನಿಲ್ಲಿಗೆ ಸುಮ್ಮನೆ...
ತುಂಬು ಚಂದಿರ, ಮುಟ್ಟಿದರೆ ತುಳುಕುವ ಮದ್ಯದ ಬಟ್ಟಲು,
ಹಿಡಿದರೆ ಕರಗಿ ಹೋಗುವಂತಹ ನಾನು...
ಸಾಕಿಲ್ಲವೆ, ಈ ರಾತ್ರಿಗೆ!!

ಮೊದಲ ಗುಟುಕು ನೆತ್ತಿಗೆ ಹತ್ತಬಹುದು, ಎರಡನೇಯದ್ದು
ಎದೆಯನುರಿಸಬಹುದು, ಮೂರು, ನಾಲ್ಕು, ಐದು, ಆರು
ನಂತರ....ಸರಾಗವಾಗಿ ಒಳಗಿಳಿಯುವುದು ಮದ್ಯವು ಪಾಗಲ್...
ಅನುದಿನವವಳ ನೆನಪುಗಳ ಕಾವಿಗೆ ಸಿಕ್ಕು, ಉರಿದು
ಹೋಗುತ್ತಿರುವ ಒಡಲು ಚೂರು ತಣ್ಣಗಾಗಬಹುದು...
ಅರೆಕ್ಷಣ, ನಿಂದಕರು ನಿಂದಿಸಿದ ಮಾತುಗಳನ್ನೆಲ್ಲವ
ಮರೆತು ಮಲಗಬಹುದು..

ವಿಷವನ್ನೇ... ಕುಡಿದು... ಸತ್ತು, ಸ್ವರ್ಗಕ್ಕೊ..? ನರಕಕ್ಕೊ..?
ಹೋಗಬೇಕೆಂಬ ಹಪಹಪಿತನ ನಿನಗೇತಕೋ ಪಾಗಲ್...
ಸ್ವರ್ಗದಲ್ಲಿ ಸುರಪಾನಕ್ಕೆ ಮೊದಲ ಆದ್ಯತೆ, ಕಲಿತುಬಿಡು.
ನರಕದ ಬಗ್ಗೆ ಚಿಂತಿಸಲೆಬೇಡ..!!! ಅವಳಿಲ್ಲದೆ, ಕನವರಿಸಿ...
ಕನವರಿಸಿ... ಕಮರಿ ಹೋಗುತ್ತಿರುವ ಹರೆಯ ನಿನ್ನದು...
ಇದಕ್ಕಿಂತ ಬೇರೆ, ನರಕವೊಂದಿದೇಯಾ?

ಬಟ್ಟಲಿನ ಅಂಚು ಹರಿತವಿಲ್ಲ, ನನ್ನಧರದ ಸವಿಯು
ಸಪ್ಪಿಲ್ಲ... ಚುಂಬಿಸಿ ನೋಡಬಾರದೆಕೆ ಎರಡಕ್ಕೂ ಪಾಗಲ್....
ಜಾಣ ಹುಚ್ಚರ ನಡುವೆ... ನರಳಿ..ನರಳಿ..ನಲಗುವುದಕ್ಕಿಂತ,
ಬಂದಿಲ್ಲಿ, ಕುಡಿದುಬಿಡು... ಬಟ್ಟಲೊಳಗಿನ ಮದ್ಯವನು!!
ಎದೆಗೆರಿದ ನಂಜು ಇಳಿಯಬಹುದು,
ಕಚ್ಚಿ ರಸ ಹೀರಿಬಿಡು ಕೆಂದುಟಿಗಳದ್ದು, ತಲೆಗೆರಿರುವವಳ ಮತ್ತು ಕರಗಬಹುದು....