ನಿನ್ನ ನೆನೆದು

ನಿನ್ನ ನೆನೆ ನೆನೆದು ನಾ
ಬಿಡುವ ನಿಟ್ಟುಸಿರಿಗೆ
ಬಳ್ಳಿಯ ಹೂಗಳೆ ಕಮರುತಿವೆ

ನೆನಪುಗಳ ಸುಳಿ ಸುಳಿದು
ಬರುವ ಕಣ್ಣೀರಿಗೆ ಕಿಟಕಿಯ
ಸರಳುಗಳೆ ತುಕ್ಕು ಹಿಡಿಯುತ್ತಿವೆ

ನೀನಾಡಿದ ಚುಚ್ಚು ಮಾತಿನ
ಮೊನಚಿಗೆ ಕೊರಳಿನ ಹಾರದ
ಮುತ್ತುಗಳೆ ಒಡೆಯುತ್ತಿವೆ

ಹಗಲಲಿ ಬಾರದೆ, ಕನಸಲಿ
ಇಣುಕದೆ, ಮನಸಲಿ ನಿಲ್ಲದೆ
ಕೊರೆಯುತ್ತಿರುವೆ ನನ್ನ ಕೊರಡಂತೆ

ಸಾಕಾಯ್ತೇ? ಅಲೆದ ಜಾಗ, ಆಡಿದ
ಮಾತು, ನೀಡಿದ ಕೊಡುಗೆ, ಮಾಡಿದ
ಆಣೆ, ಮುಡಿಸಿದ ಹೂವು, ಕೊಡಿಸಿದ
ಬಳೆ, ಹುಸಿ ಮುನಿಸು, ನಾನೀರುವೆನೆಂಬ
ಭರವಸೆ ಇಂದಿಲ್ಲವಾಯಿತೆ?

ಇಷ್ಟು ದಿನಗಳು ನನ್ನೊಡಗೂಡಿ
ಅಲೆದ ನಿನಗೆ ಯಾರದೂ ಮಾತಿನ
ನಂಬಿಕೆಗೆ ಶಂಕಿಸಿ ಕುರುಡು ಪ್ರೀತಿಯ
ಈ ಹುಡುಗಿಯನು ಬಿಟ್ಟು ಹೊದೇಯಾ
ಬಾವಿಯ ಕಟ್ಟೆಗೆ ಕುಳ್ಳರಿಸಿ