ಮಂಗಳಮುಖಿ ೨

ದಬ್...ದಬ್....ದಬ್...ದಬ್ಬೆಂದು ಬಾಗಿಲು ಬಡಿಯುವ ಸದ್ದು, ಮಲ್ಲಪ್ಪ ನಿದ್ದೆಗಣ್ಣಿನಲ್ಲಿ ಗೊಣಗುತ್ತಲೆ ಹಾಸಿಗೆಯಿಂದ ಎದ್ದು, ಕೋಣೆಯ ಲೈಟನ್ನು ಹಾಕಿ ಗೋಡೆಗೆ ನೇತು ಹಾಕಿದ್ದು ಗಡಿಯಾರವನ್ನು ನೋಡಿದನು ಆಗಲೆ ಐದು ಮುಕ್ಕಾಲಾಗಿತ್ತು, ' ಛೆ ಯಾಕಿಷ್ಟೊತ್ತು ಮಕ್ಕೊಂಡ್ಬಿಟ್ಟಿ ಇವತ್ತು,,' ಎಂದುಕೊಳ್ಳುತ್ತಲೆ ' ಯಾರ್ರೀ ಅದು..?' ಅಂತಾ ಕೇಳುತ್ತಲೆ ಬಾಗಿಲ ಹತ್ತಿರ ಬಂದು ಬಾಗಿಲನ್ನು ತೆಗೆದು ನೋಡಿದನು. ಹೊರಗೆ, ದೆವ್ವವನ್ನು ಕಂಡು, ಗರ ಬಡಿದವರಂತೆ ಕಣ್ಣಲ್ಲಿ ಭಯವನ್ನು ತುಂಬಿಕೊಂಡು ಕೈ ಕಾಲುಗಳೆಲ್ಲ ನಡಗಿಸುತ್ತಾ ನಿಂತಿದ್ದಳು ನಿಂಗವ್ವ.

'ಯಾಕ್ಬೆ ತಂಗಿ ಇಷ್ಟ ನಸಿನ್ಯಾಗ (ನಸುಕಿನಲಿ), ಬಾಗ್ಲ ಬಡಿಯಾಕ್ಹತ್ತಿಯಲ್ಲ, ಏನಾತ ?' ತನ್ನ ಪಿಚ್ಚುಗಟ್ಟಿದ ಕಣ್ಣುಗಳನ್ನು ತಿಕ್ಕುತ್ತಾ, ಹಾ... ಎಂದು ಆಕಳಿಸುತ್ತಲಿದ್ದನು.

'ಅಣ್ಣ...' ಎನ್ನುತ್ತಲೆ ಕಣ್ಣಿಂದ, ಕಾಲುವೆ ಒಡೆದು ಹರಿವ ನೀರಿನಂತೆ ಕಣ್ಣೀರು ಹರಿಯತೊಡಗಿತು.

ನಿಂಗವ್ವ ಅಳುವುದನ್ನು ಕಂಡ ಬೆದರಿದ ಮಲ್ಲಪ್ಪ, ಪೂರ್ಣವಾಗಿ ಎಚ್ಚರವಾದಂತಾಗಿ ' ಬಾ...ಬಾ... ಒಳಗ ಬಾರವ ಮೊದ್ಲ ನೀನು' ಎಂದು ಮನೆಯ ಒಳಗೆ ಕರೆದು ' ಲೆ ಇವ್ಳೆ, ಬಾರೆ ಬೇಗ, ' ಹೆಂಡತಿಯನ್ನು ಕೂಗುತ್ತಾ, ಪಡಸಾಲೆ ಕೋಣೆಯ ಲೈಟನ್ನು ಹಾಕಿ, ನಿಂಗವ್ವನಿಗೆ ಕುಳಿತುಕೊಳ್ಳಲು ಕುರ್ಚಿಯನ್ನು ಹಾಕಿದನು. ಸೀರೆ ಸೇರಗಂಚಿಂದ ಬಾಯಿಯನ್ನು ಗಟ್ಟಿಯಾಗಿ ಹಿಡಿದುಕೊಂಡು, ಮುದ್ದೆಯಾಗಿ ಕುರ್ಚಿಯ ಮೇಲೆ ಕುಳಿತುಕೊಂಡಳು. ಅಷ್ಟರಲ್ಲಿ ತಲೆಯ ತುರುಬನ್ನು ಕಟ್ಟಿಕೊಳ್ಳುತ್ತಾ ಮಲಗುವ ಕೋಣೆಯಿಂದ ಹೊರಗಡಿಯಿಡುತ್ತ,

'ಏನ್ರೀ ನಿಮ್ದು, ರಾಮಾಯಾಣ ಇವತ್ತೊಂದ ದಿನಾನರ ಇನ್ನೊಂದ ಗಳ್ಗಿ ನಿದ್ದಿ ಮಾಡ್ತಿದ್ನಿ, ರಾತ್ರಿ ಎಷ್ಟೊತ್ತನಾ ನಿಂ...' ಬಾಯೊಳಗಿನ ಮಾತು ಎದುರಿಗೆ ನಿಂಗವ್ವ ಕುಂತಿದ್ದನ್ನು ನೋಡಿ ಮಾತು ಅರ್ಧದಲ್ಲೆ ಕತ್ತರಿಸಿತು. ಕಣ್ಣುಗಳನ್ನು ಕಾಸಗಲ ಅಗಲಿಸಿಕೊಂಡು ಅಳುತ್ತಿದ್ದ ನಿಂಗವ್ವನ ಹತ್ತಿರ ಬಂದು ಎರಡು ಕೈಗಳಿಂದ ಅವಳ ಭುಜವನ್ನು ಹಿಡಿದುಕೊಂಡು 'ಅಯ್ಯ, ಶಿವ್ನ ಯಾಕ ಯವ್ವಾ, ಏನಾತ ಮುಂಜ ಮುಂಜಾನೆದ್ದ ಕಣ್ಣೀರ ಹಾಕ್ಕೊಂತ ಬಂದಿಯಲ್ಲ ಹಡದವ್ವ, ಅಂತಾದೇನಾತಿಗ, 

ಅಲ್ಲಾ‌ ಇವತ್ತೀನ ದೈವದ ಕಾರ್ಯದ ಅಡ್ಗಿಗೆ ಎಲ್ಲಾ ನಿನ್ನೆ ರಾತ್ರಿನ ಹೆಚ್ಚಿ, ವಾಗತ್ತ ಮಾಡಿಬಂದಿದ್ನೆಲ್ಲಬೆ..‌ಏನಾರ ಇನ್ನೂ ಮಾಡೋದೈತನು, ಅಣ್ಣ ಏನಾರ ರಗಳಿ ಪಗಳಿ ತಗ್ದಾನನು ಮತ್ತ' ಉಸಿರು ಬಿಡದ ಹಾಗೆ ಒಂದೆ ಸಮನೆ ಪ್ರಶ್ನೆಗಳ ಸುರಿಮಳೆಯನ್ನೆ ಗೈದಳು.

'ಅಯ್ಯಯ್ಯ...ಯ್ಯ.. ನಿನ್ನ ಬಾಯೇನರ ಕಟ್ಗಿದಾಗಿತ್ತಂದ್ರ ಇಟೊತ್ತಿಗಾಗ್ಲೆ ಒಡ್ದ ಹೊಕ್ಕಿತ್ತ ನೋಡ, ಸ್ವಲ್ಪ‌‌ ಸುಮ್ಕೀರು ಇಟು.

ಅದೇನದು ಬಾವ್ಯಾನ ಕಪ್ಪಿ ಒಟಗುಟ್ಟೊ ಹಂಗ ಒಂದ ಸಮ್ನ ಒಟಗುಟ್ಟಾಕ ಹತ್ತೀದಿ, ಹೋಗಿ ಬಾಯ್ಯಾಗ ನೀರ ಹಾಕ್ಕೊಂಡ 

ಒಲಿ ಹೂಡ ಹೋಗು, ಸ್ವಲ್ಪ ಚಾ ಮಾಡ್ಕೊಂಡ ಬಾ ಹೋಗಿಟು ಜಲ್ದಿ'

'ಹ್ಞಾಂ....ಹ್ಞಾಂ... ಹ್ಞಾಂ.. ಸುಕುಮಾರ.‌ ಕೋಳಿ ಕೂಗೊದ ತಡ ಆಗೋದಿಲ್ಲ ಮುಂಜಾನಿಂದ ಸಂಜಿ ತನ್ಕ ಹಂಗ ಚಾ...ಚಾ.. ಅಂತಂದ ನನ್ ಜೀವ ಹಿಂಡ್ತಾನ, ತರ್ತೀನಿ ಇರಪ್ಪ ಒಂದಿಟು. ಇಲ್ಲಿ ನೋಡಿಲ್ಲೆ, ಇವತ್ತ ನಕ್ಕೊಂತ ಇರ್ಬೇಕಾದಾಕಿ ಅತ್ಗೊಂತ ಕುಂತಾಳ, ಏನಾತಂದ ಕೇಳ್ಬ್ಯಾಡ, ಚಾ ಬೇಕಂತ ಚಾ'

'ಅಯ್ಯ ನಿನ್ನ ಕೈ ಕಾಲ ಮುರ್ದ ಹಂಡೆ ತುಂಬ್ಲಿ, ನಿ ಹೋಗಿ ಮೊದ್ಲಾಕ ಮೊಖಾ ತೊಕ್ಕೊಂಡು ಚಾ ಮಾಡ್ಕೊಂಡ ಬಾ ಹೋಗಿಗ ಅದೇನ ವಿಷ್ಯಾ ಅಂತಂದ ನಾ ವಿಚಾರ ಮಾಡ್ತೀನಿ' ಅಧಿಕಾರದ ಧನಿಯಲ್ಲಿ ಹೇಳಿದನು.

ನಿಂಗವ್ವನನ್ನು ಬಿಟ್ಟು ಬಿರಬಿರನೆ ಸ್ನಾನದ ಕೋಣೆಯತ್ತ ಹೋದಳು ಮಲ್ಲಪ್ಪನ ಮಡದಿ ಶಾಂತವ್ವ.

ನಿಂಗವ್ವನ ಎದುರಿಗೆ ಇನ್ನೊಂದು ಖುರ್ಚಿಯನ್ನು ಹಾಕಿಕೊಂಡು ಕುಳಿತ ನಿಂಗಪ್ಪನು ' ಹ್ಞೂಂ... ಏನಾತವ ತಂಗಿ'

'ಅಣ್ಣಾ... ಶಶಿಯಪ್ಪ ಕಾಣಾಕ ಹತ್ತಿಲ್ಲ' ಬಾಯಿಗೆ ಹಿಡಿದಿದ್ದ ಸೆರಗನನ್ನು ಸರಿಸಿ, 

ನಿಂಗವ್ವನ ಮಾತಿನಿಂದ ಸ್ವಲ್ಪ ವಿಚಲಿತನಂತಾಗಿ ಕಂಡು ಬಂದ ಮಲ್ಲಪ್ಪ ' ಹ್ಞಾಂ, ಕಾಣಾವಲ್ಲ ಹಂಗಂದ್ರ ಏನ್ಬೆ ?'

'ಅಂವ ಮನಗೊ ಕೋಣ್ಯಾಗ್ನೂ ಇಲ್ಲ, ಹಿತ್ಲದಾಗೂ ಇಲ್ಲ, ಅದು ಅಲ್ದ ಮನಿ ಮುಂಬಾಗ್ಲ ತಗದಿದ್ದ ಇತ್ತ'

'ಹೇ ನಿಮಾಂಬ್ಳ ಇಲ್ಲೆ ಎಲ್ಲರ‌ ಹೊರ್ಗ ಹೋಗಿರ್ಬೇಕು ತಂಬ್ಗಿ(ಬೆಳಗಿನ ಕಾರ್ಯವನ್ನು ಮುಗಿಸಿಕೊಂಡು ಬರುವುದು)ತಗೊಂಡು'

'ಇಲ್ಲಣ್ಣ, ಅವ್ನು ಯಾವತ್ತು ಇಷ್ಟ ಜಲ್ದಿ ಎದ್ದಿದ್ದ ಇಲ್ಲ, ಜಗಲಿ ಮ್ಯಾಲಿಟ್ಟಿದ್ದ ಅವ್ನ ಬಟ್ಟಿ ಬ್ಯಾಗು ಕಾಣವಲ್ದ, ಮೊನ್ನಿ ಗೋವಿನ ಜ್ವಾಳ ಮಾರಿ ಬಂದ ಪಟ್ಟಿ ರೊಕ್ಕಾನು ಅವ್ನ ಕೈಯ್ಯಾಗ ಕೊಟ್ಟಿದ್ನಿ ತಿಜೋರಿಯೊಳ್ಗ ತಗದಿಡಾಕ, ಆ ರೊಕ್ಕಾನು ಕಾಣುವಲ್ದಾಗೈತಿ, ಎಲ್ಲೆ!!!! ಮೊನ್ನೆ ಮೂಲಿಮನಿ ಶಂಕ್ರಪ್ಪ ಹೇಳ್ದಂಗ ಏನರ...?' ಗದ್ಗರಿತ ದನಿಯಿಂದ ಮಲ್ಲಪ್ಪನನ್ನು ದಿಟ್ಟಿಸಿ ನೋಡಿದಳು ಮಾತನ್ನು ಅರ್ಧದಲ್ಲೆ ಕತ್ತರಿಸುತ್ತ

ನಿಂಗವ್ವನನ್ನೆ ದಿಟ್ಟಿಸಿ ನೋಡುತ್ತಾ, ಮೊನ್ನೆ ಸಂಜೆಯಲ್ಲಿ ಶಂಕ್ರಪ್ಪನು ತಾನು ಸಂತೆಯಲ್ಲಿ ಕಂಡ ವಿಷಯವನ್ನು ಹೇಳಿದ್ದು ನೆನಪಾಯಿತು.

'ಏ ನಿಂ ಶಶಿಯಪ್ಪ ಯಾವ್ದ ಹುಡ್ಗಿ ಕರ್ಕೊಂಡ ಗಡಾದನ ಸಿದ್ದಲಿಂಗೇಶ್ವರ ಟಾಕೀಸ್ ಗೆ ಸಿನಿಮಾ ನೋಡಾಕ ಬಂದಿದ್ನಪಾ?'

' ಹೇ ಹೋಗ್ಗ ನಿಮ್ಮೌನ ನಂ ಶಶಿಯಪ್ಪ ಅಂತವಲ್ಲ, ಬ್ಯಾರೆ ಯಾರನ್ನರ ನೋಡಿರಬೇಕ ನೋಡ ಮಗ್ನಾ, ಮದ್ವಿ ಇನ್ನೊಂದ ವಾರ ಇಟ್ಗೊಂಡ ಅಂವ ಯಾ ಹುಡ್ಗಿ ಕಟ್ಗೊಂಡು ಸಿನ್ಮಾಕ ಹೊಕ್ಕಾನಲೆ' ಗದರಿಸಿದನು ನಿಂಗಪ್ಪ

' ದೇವ್ರಾಣ್ಯಗೊ ಮಾರಾಯ, ಸುಳ್ಳು ಹೇಳಿ ನಂಗ್ಯಾವ ರಾಜ್ಯಾ ಆಳೊದೈತಿ'

'ಹುಡ್ಗಿ ಯಾರಂತ ನೋಡಿದೇನು?'

' ಇಲ್ಲೊ ಮಾರಾಯ ಅವ್ರ ಮುಂದ ಕುಂತಿದ್ರ ನಾ ಹಿಂದ ಕುಂತಿದ್ನಿ, ಆಕಿ ಹೆಗ್ಲ ಮ್ಯಾಲ ಕೈ ಹಾಕ್ಕೊಂಡ ಕುತ್ಗೊಂಡ ಸಿನ್ಮಾ ನೋಡದ ಬಿಟ್ಗೊಟ್ಟ ಏನೊ ಗುಸುಗುಸು ಅಂತಂದ ಮಾತಾಡತಿರೊ ಹಂಗ ಕಾಣ್ಸತಿತ್ತಾ... ಸಿನ್ಮಾ ಮುಗ್ದಿಂದ ಹಿಡಿಬೇಕ ಅಂತನ್ನುವಷ್ಟರದಾಗನ ಹ್ಯಾಂಗ ಪಾರಾಗಿಬಿಟ್ರನ ಪಾರಾಗಿ ಬಿಟ್ಟ ನೋಡ'

ಶಂಕ್ರಪ್ಪ ಅಂದಾಡಿದ ಮಾತುಗಳು ಇವತ್ತು ಶಶಿಕಾಂತನು ಹಣ ಮತ್ತು ಬಟ್ಟೆಯೊಂದಿಗೆ ಮನೆಯಲ್ಲಿ ಇಲ್ಲದಿರುವುದು ಹಲವಾರು ಅನುಮಾನಕ್ಕೆ ಆಸ್ಪದಕ್ಕೆ ಎಡೆ ಮಾಡಿಕೊಟ್ಟಿತು ನಿಂಗಪ್ಪನಿಗೆ. ತಡಮಾಡದೆ ಮಗ ನಾಗರಾಜನ್ನು ಎಬ್ಬಿಸಿ ತನ್ನ ಜೊತೆಯಲ್ಲಿ ಇಬ್ಬರು ಗೆಳೆಯರನ್ನು ಕರೆದುಕೊಂಡು ಶಶಿಯಪ್ಪನನ್ನು ಗಜೇಂದ್ರಗಡದ ಬಸ್ ಸ್ಟ್ಯಾಂಡವರೆಗೂ ಹೋಗಿ ಹುಡುಕಿಕೊಂಡು ಬರುವಂತೆ ಹೇಳಿ, ಪಕ್ಕದ ಮನೆಯವರನ್ನು ಎಬ್ಬಿಸಿ ಅವರ ಮೊಟಾರ್ ಬೈಕ್ ನ್ನು ಮಗನಿಗೆ ಕೊಟ್ಟು ಕಳುಹಿಸಿದನು. ಮನೆಯ ಒಳಗಡೆ ಬಂದು ಹೆಂಡತಿ ಮಾಡಿಕೊಟ್ಟ ಚಹಾವನ್ನು ಕುಡಿದು, ಸ್ನಾನ ಮಾಡಿ ಬಟ್ಟೆಯನ್ನು ಹಾಕಿಕೊಂಡು

'ಹೆದರ ಬ್ಯಾಡ ತಂಗಿ ಇಲ್ಲೆ ಎಲ್ಲರ ಇರ್ತಾರ ಅವ್ರ ಹುಡ್ಕಿ ಕರಕೊಂಡ ಬರ್ತಿನ ಹುಡ್ಗ ಬುದ್ದಿ. ಮತ್ ತವ್ರ ಮನಿಗೆ ಪೋನ್ ಮಾಡಾಕ ಹೋಗಬ್ಯಾಡ ಈ ಸುದ್ದಿ ನಮ್ ನಮ್ ಒಳಗ ಇರಲಿ ಸದ್ಯಾಕ‌‌. ಆತ'

ಎಂದಾಗ ಆಗಲಿ ಎಂಬಂತೆ ಅಳುತ್ತಾ ತಲೆಯಾಡಿಸಿದಳು ನಿಂಗವ್ವ.

'ಶಾಂತಾ, ತಂಗಿನ ಎಲ್ಲೂ ಕಳಿಸಾಕ ಹೋಗಬ್ಯಾಡ ದ್ಯಾವ್ರ ಕಾರ್ಯನಾ ಸ್ವಾಮೇರ ಬಂದ ಮ್ಯಾಕ ನೇಮದ ಪೂರತ್ಯಾಕ ಮಾಡಿ ಮುಗಿಸಿ ದಕ್ಷಣಾ ಕೊಟ್ಟ ಕಳಿಸಿಬಿಡ್ರಿ, ಊಟಕ್ಕ ಯಾರ್ಗೂ ಹೇಳಾಕ ಹೋಗಬ್ಯಾಡ್ರಿ, ತಿಳಿತಿಲ್ಲೊ?' ಎನ್ನುತ್ತಲೆ ಅವರ ಮರು ಮಾತುಗೂ ಕಾಯದೆ, ಬಾಗಿಲ ಬಳಿ ಬಿಟ್ಟಿದ್ದ ಚಪ್ಪಲಿಯನ್ನು ಹಾಕಿಕೊಂಡು ನಡೆದುಬಿಟ್ಟನು ನಿಂಗಪ್ಪ ಶಶಿಯನ್ನು ಹುಡುಕಲು ಗೊತ್ತು ಗುರಿಯಿಲ್ಲದೆ.

ಕಾಲೇಜು, ಗೆಳೆಯ-ಗೆಳತಿಯರು, ಸಿನಿಮಾ ಟಾಕೀಜು, ಲಾಡ್ಜಗಳು, ಕಾಲಕಾಲೇಶ್ವರ ಬೆಟ್ಟ, ಸರಕಾರಿ ಉದ್ಯಾನವನ, ದೇವಸ್ಥಾನಗಳು, ಮಠ- ಮಸಿದಿಗಳು, ಸಬ್ ರಿಜಿಸ್ಟ್ರಾರ್ ಆಫೀಸು ಎಲ್ಲ ಗಜೇಂದ್ರಗಡ, ಸುತ್ತಮುತ್ತ ಪರಿಚಯವಿರುವಂತಹ ಎಲ್ಲ ಜಾಗಗಳ ಮೂಲೆಮೂಲೆಯನ್ನು ಹುಡುಕಿದರು ಶಶಿಕಾಂತನ ಸುಳಿವು ಸಿಗಲೆ ಇಲ್ಲ.

ನಿಂಗವ್ವ ಬೆಳಿಗ್ಗೆಯಿಂದ ಹನಿ ನೀರನ್ನು ಕುಡಿಯದೆ ಕುಳಿತ ಜಾಗದಿಂದ ಕದಲಿರಲಿಲ್ಲ. ಸಮಯ ರಾತ್ರಿ ಎಂಟಾಗುತ್ತ ಬಂದಿತ್ತು. ಶಾಂತವ್ವಳೊಬ್ಬಳೆ ದೇವರ ಕಾರ್ಯವನ್ನು ಮುಗಿಸಿ, ಕೇಳಿದವರೆಲ್ಲರಿಗೂ ನಿಂಗವ್ವಳ ಮೈಯಲ್ಲಿ ಹುಷಾರಿಲ್ಲ ಎಂದ ಹೇಳುತ್ತಲೆ ಎಲ್ಲರನ್ನೂ ಸಾಗು ಹಾಕಿ ಬಂದಿದ್ದಳು. 

'ಅಯ್ಯ ನಮ್ಮವ್ವ ಮುಂಜಾನಿಂದಾನು ಹಂಗ ಖಾಲಿ ಹೊಟ್ಟಿಲೆ ಕುಂತಿದಿ, ಊಟ ಮಾಡ್ದಿದ್ರೇನಾತು ಕಪ್ ಚಾ ನರ ಕುಡಿಯೇಳವ ಮುಖಾ-ಮೊತಿ ತೊಳ್ಕೊಂಡ' ದುಃಖಭರಿತವಾದ ಧನಿಯಲ್ಲಿ ಹೇಳಿದಳು.

ಏನೊಂದು ಮಾತನ್ನು ಆಡಲಿಲ್ಲ ನಿಂಗವ್ವ. ಅಷ್ಟರಲ್ಲಿ ಊರಿನಿಂದ ಬರಿಗೈಯಲ್ಲಿ ಬಂದಂತಹ ನಿಂಗಪ್ಪನು, ಶಶಿಕಾಂತನ ಬಗ್ಗೆ ಯಾವುದೇ ಸುಳಿವು ಸಿಗದಿದ್ದ ಬಗ್ಗೆ ಹೇಳಿ, ಪೋಲಿಸ್ ಕಂಪ್ಲೇಟ್ ಮತ್ತು ತವರು ಮನೆಯವರಿಗೆ ವಿಷಯವನ್ನು ತಿಳಿಸಿ ಬಂದಿದ್ದೇನೆ ಎಂದು ಹೇಳಿದನು.

ವಾರ ಕಳೆಯಿತು, ಶಶಿಯ ಸಲುವಾಗಿ ನಾಗರಾಜನ ಮದುವೆಯನ್ನು ನಿಲ್ಲಿಸವುದು ಬೇಡವೆಂದು ನಿಂಗವ್ವಳೆ ಬಲವಂತ ಮಾಡಿ ಎಲ್ಲರನ್ನು ಒಪ್ಪಿಸಿ ನಾಗರಾಜನ ಮದುವೆಯನ್ನು ಮಾಡಿದ್ದರು. 

ದಿನ-ವಾರ-ತಿಂಗಳುಗಳೆ ಕಳೆದು ಹೋದವು. ಮಗನನ್ನು ನೆನೆಯುತ್ತ ನಿಂಗವ್ವ ದಿನೆ ದಿನೆ ಕುಗ್ಗುತ್ತಾ ಹೋದಳು. ತೋಟವು ಬಡವಾಗತೊಡಗಿತ್ತು.

ನಿಂಗಪ್ಪ ದಂಪತಿಗಳು, ತವರು ಮನೆಯವರು, ಊರು-ಕೆರಿಯ ಹಿರಿಯರೆಲ್ಲ ಎಷ್ಟೇ ಸಮಾಧಾನ ಮಾಡಿದರು, ಇದ್ದ ಒಬ್ಬನೆ ಒಬ್ಬ ಮಗನು ಇಲ್ಲವಾದದ್ದನ್ನು ನೆನೆದು ನೆನೆದು ದಿನವಿಡಿ ಅಳುತ್ತಾ 

ಕುಳಿತುಕೊಂಡು ಬಿಟ್ಟಿರುತ್ತಿದ್ದಳು. 

ಈ ಸಮಯದಲ್ಲಿ  ನಾಗರಾಜನ ಸೀಮಂತ ಕಾರ್ಯವು ಮುಗಿದು, ಮುದ್ದಾದ ಹೆಣ್ಣು ಮಗುವು ಹುಟ್ಟಿ, ನಾಮಕರಣವು ಜರುಗಿ ಹೋಯಿತು.

 ವರ್ಷವೆ ಕಳೆದು ಹೋಯಿತು. ಒಲೆಯ ಮೇಲೆ ರೊಟ್ಟಿ ಮಾಡುತ್ತ ಕುಳಿತಿದ್ದಳು ನಿಂಗವ್ವ, 'ನಿಂಗವ್ವ... ನಿಂಗವ್ವ.. ಬೆ ನಿಂಗವ್ವ' ಮನೆಯ ಹೊರಗಿನಿಂದ ಜೋರಾಗಿ ಯಾರೊ ಕೂಗಿದ ಸದ್ದು ಕೇಳಿಸಿತು ನಿಂಗವ್ವಳಿಗೆ..