ಇತಿಹಾಸವಾಗಲೆಬೇಕಲ್ಲ ಸಾಕಿ ೬

ನಿನ್ನ ಮದಿರೆ ಮನೆಯ ಗೋಡೆಯ
ಮೇಲೆ, ನನ್ನ ಪ್ರೇಮದಿತಿಹಾಸವನ್ನು
ಬರೆಸಿಬಿಡು ಸಾಕಿ...
ಹೋಗಿ ಬರುವವರೆಲ್ಲರಿಗೂ...
ಗೊತ್ತಾಗಬೇಕಲ್ಲವೆ..ಅವಳ ಹೆಸರಲಿ
ಅಳಿದ ಮೊದಲ ಹೆಸರು ನನ್ನದೆ..ಎಂದು

ನಾ ಕುಡಿದುಬಿಟ್ಟ ಮದಿರೆ ಹೂಜಿಗಳ
ಲೆಕ್ಕವನ್ನು ಬರೆದು... ತೂಗು ಹಾಕಿರು
ಸಾಕಿ....ಮಧುಶಾಲೆಯ ಮುಖ್ಯ ದ್ವಾರಕ್ಕೆ....
ನಿನ್ನ ಮಧು ಬಟ್ಟಲನ್ನು ಹಿಡಿಯುವ
ಮೊದಲು, ಅವರೆಲ್ಲ ಯೋಚಿಸಬೇಕಲ್ಲವೆ...
ಯೋಚಿಸಲೇನಿದೆ...? ಅವಳೆ.. ಕೈ ಬಿಟ್ಟು
ಹೋಗಿರುವಾಗ

ಅವಳ್ಹೆಸರಲಿ ತಂದ ಮಲ್ಲಿಗೆಯ ಗುಚ್ಚವು...
ನಿತ್ಯ ಸಂಜೆಗೆ ನರ್ತಿಸುವ ನಿನ್ನ ಕಾಲಡಿಯಲಿ
ಸಿಕ್ಕು...ಹೊಸಕಿ ಹೋದಾಗ, ಅವುಗಳನ್ನು
ಬಳೆದು ಕಸದ ಬುಟ್ಟಿಗೆ ಹಾಕದಿರು.....
ಸಾಕಿ
ಅವುಗಳೆದೆಯ ಮಕರಂದವೇನೊ...ನಿನ್ನ
ಕಾಲ್ಮದರಂಗಿಗೆ ಮೆತ್ತಿಗೊಂಡಿದೆ, ನನ್ನೆದೆಯ
ನೋವ ಕಣ್ಣೀರಿನ ಹನಿಗಳಿನ್ನೂ...ಅವುಗಳೆದೆಯಲ್ಲೆ
ಉಳಿದುಕೊಂಡಿವೆ, ಬರುವವರಿಗೆಲ್ಲ ಅರಿವಾಗಬೇಕಲ್ಲ
ಹೂವಲ್ಲೂ... ನೋವಿದೆಯೆಂಬುದು

ನಾ ಸತ್ತು...ಹುಗಿದ ಗೋರಿಯ ಮೇಲೆ
ಗರಿಕೆ ಹುಲ್ಲುಗಳು ಮೊಳೆತು...ಕಸಕಂಟಿಗಳಿಂದ
ತುಂಬಿ...ದಾರಿಹೋಕ ಬಿಡಾಡಿ ನಾಯಿಯೊಂದು
ನನ್ನ ಗೋರಿಯನ್ನು ಮೂಸಿ...ತನ್ನ ಕಾಲನ್ನೆತ್ತಿ
ಮೂತ್ರವನ್ನೊಮ್ಮೆ ವಿಸರ್ಜಿಸಿದಾಗ....
ಸುಣ್ಣವ ಬಳೆದುಬಿಡು ಸಾಕಿ... ಗೋಡೆಗೆ
ಅಳಿಸಿಹೋಗಲಿ ನನ್ನ ಇತಿಹಾಸವಾಗ...
ಅವಳ ತೆಕ್ಕಯಲಿ ಇತಿಹಾಸವನ್ನೆ....
ಸೃಷ್ಟಿಸುತ್ತೇವೆಂದು ಬಂದವರೆಲ್ಲ....
ನಿನ್ನ ಮದಿರೆ ಮನೆಯ ಗೋಡೆಯ ಮೇಲೆ
ಇತಿಹಾಸವಾಗಲೆಬೇಕಲ್ಲ...