ಯಾಕ ತಂಗಿ

ಯಾಕ ತಂಗಿ..
ಹಿಂಗ್ಯಾಕ ಸೆಟಗೊಂಡ ಹೊಂಟಿ
ಛಲೋ ಅಲ್ನೋಡಿದು ನೀ ತಗೆಯೊ ತಂಟಿ
ನೀ ಇಲ್ದ ಒಣಗಿ ಹೊಂಟೈತಿ ಗುಲಾಬಿ ಕಂಟಿ
ನಿನ್ನ ಹೆಜ್ಜೆನ ಮಾತಿಲ್ದ ಮನಿಯಾಗೈತಿ ಒಂಟಿ
ಸೆಡವು ಮರತ ಮನಿಗ ಬಾರ ತುಂಟಿ

ಬೆಂಗ್ಳೂರಣ್ಣ ರೇಷ್ಮಿ ಸೀರಿ ಕೊಡ್ಸಿಲ್ಲಂತ
ಸಿಟ್ಟಾಗಿಯನು..
ಶಿರಶಿ ಅಕ್ಕೊರು ಚಕ್ಲಿ.. ಕೊಡ್ಬಳೆ ತಿನ್ಸಿಲ್ಲಂತ
ಕೊರಗಾಕ ಹತ್ತಿಯನು
ಗುರುಗಳು ಶಿಶುನಾಳಗೆ ಕರ್ದಿಲ್ಲಂತ
ಬ್ಯಾಸ್ರಾ.. ಮಾಡ್ಕೊಂಡಿಯನು..
ಹೋಗ್ಲಿ ಬಿಡ.. ತಂಗಿ ಈ ನಿಮ್ಮ
ಗಡಾದಣ್ಣ ಇಳಕಲ್ಲ ಚಮ್ಕಾ ಸೀರಿ ತರ್ತಾನ
ನಮ್ಮೂರ ಕತ್ರ್ಯಾನ ಬೆಲ್ಲದ ಜಿಲೆಬಿ ತಿನ್ನಸ್ತಾನ
ವಾರ.. ವಾರ ಮೈಸೂರು ಮಠದಾಗ ನಡೆಯೊ
ಸಂಜಿ ಹೊತ್ತನ್ಯಾಗ.. ನಿನವ ಛಲೊವೊ..
ನಾಕ ಕವನ ಓದಾಕ ಹಚ್ತಾನ..

ತೆಪ್ಪದಾಗ ಕುತಗೊಂಡ ತೆಪ್ಪಗಿರಬ್ಯಾಡ ನಮ್ಮವ್ವ
ಎಲ್ಲಾ.. ನೆನದ ನೆನದ ಕಣ್ಣಾಗ ಹನಿ ತಂದ್ಕೊಬ್ಯಾಡ
ಮೊದ್ಲ ಮಲ್ಗಿ ಬಳ್ಳಿ ಅದಿ ನೀನು ಇನ್ನಷ್ಟು ಸೊರಗಬ್ಯಾಡ
ಗೊತ್ತು ಗುರಿಯಿಲ್ದ ದಾರಿ ಹಿಡ್ದ ಹೊಂಡಬ್ಯಾಡ
ನೀ..ಹೊಳ್ಳಿ ಬರ್ತಿಯಂತಾನ ಕೈಯಾಗ ಜೀವ
ಹಿಡ್ಕೊಂಡು ಕುಂತಿವಿ ನೀ ಇದನ್ನ ಮರಿಬ್ಯಾಡ