ಹಸಿವಿಗೆ ಬಲಿಯಾರು

ಆರಿದೆ ವಲೆಯು... ಬತ್ತಿದೆ ಮೊಲೆಯು
ಹಸಿದಿದೆ ಹೊಟ್ಟೆಯು.. ಈ ಒಂದ್ಹೊತ್ತು
ನನಗೂ ನಿನ್ನ ಕೆಚ್ಚಲಿನ ಹಾಲನ್ನು ಕುಡಿಸೆಯಾ
ಆಡವ್ವ.... ಕಂದನ ಗಂಟಲಪಸೆಯ ಬಾಯಾರಿಕೆಯ
ನೀಗಿಸವ್ವ...

ಓ.. ಮೂಕದೇವಿಯೆ ಮಾಂಸದುಂಡೆಯಾ
ಗುವೆಯಲ್ಲೆ... ನಮ್ಮಯ ಹಿಡಿ ಹಿಟ್ಟಿಗೆ
ಸಂಜೆಗೆ.. ಖಾರದೂಟವಾಗುವೆಯಲ್ಲೆ
ಉಳ್ಳವರ ಹೊಟ್ಟೆಗೆ
ಬರೀ... ಹಸಿವಿನ ಹಾಲ್ವಾಸನೆಯೆ
ಸುಳಿದಾಡುವುದಾಗ ಹಟ್ಟಿಯೊಳಗೆ

ನಿನ್ನ ಮಾರಿ ಬಂದ ಹಣವು
ನೀಗಿಸುವುದೆ ಪೂರ್ಣ ಬಾಳಿನ ಹಸಿವು
ಮತ್ತೆ.....? ಬೀಳದಿರುವುದೆ ಕಣ್ಣು
ನಾಳೆಯೊ...ನಾಡಿದ್ದೊ ಇನ್ನೊಬ್ಬರ
ಮನೆಯ ಪಾತ್ರೆಯಲಿ ಮರಿಯೂ... ಕುದ್ದು
ಕುದ್ದಾಗವುದು ಹಣ್ಣು

ನಿಮ್ಮಿಬ್ಬರ ಸಾವಿನ ದಿನಗಳು
ಹಸಿವಿನ ಹೊತ್ತುಗಳ ಕಡಿಮೆಗೊಳಿಸಬಲ್ಲವೆ
ವಿನಃ.... ನಿಲ್ಲಿಸಲಾರವು
ಹಾಗಾದರೆ... ಮುಂದಿನ ತುತ್ತಿನ ಹೊತ್ತುಗಳಿಗಾಗಿ
ಮಾರಾಟವಾಗುವ ಜೀವ ಯಾವುದು..?
ಉಳಿದ ಹಸಿವಿನ ದಿನಗಳು ಬಲಿಯ
ಬೇಡುತ್ತಿರುವುದನ್ನಾದರು ಯಾರನ್ನೊ.‌‌‌‌...?