ಬಿತ್ತಲೆದೆಗೆ ಬೀಜವ

ನಿನ್ನ ಎದೆಯಲೊಂದು
ಬಿತ್ತಬೇಕೆಂದಿದ್ದೆ ಪ್ರೇಮದ
ಬೀಜವ

ನಿರಾಕರಿಸಿದೆ...

ಏಕೇ?

ನನ್ನ ಪ್ರೇಮದ ಬೇರು
ನಿನ್ನ ಉಸಿರಾಡಲು ಬಿಡದಂತೆ
ಬಿಗಿಯುತ್ತಿತ್ತೆ ?

ನರನಾಡಿಗಳಲಿ ಹೊಕ್ಕು
ನೆತ್ತರನೆಲ್ಲವ ಹೀರಿ ನಿನ್ನಂದವ
ಬತ್ತಿಸುತಿತ್ತೆ ?

ಪ್ರೇಮದ ಅಮಲಿನಲಿ
ತೇಲಿಸಿ, ಕಣ್ಣಿಗೆ ಪೊರೆಯನು
ಸುತ್ತುತ್ತಿತ್ತೆ?

ಹುಚ್ಚಿ...

ಒಮ್ಮೆ ನೀನು ಬಿತ್ತಲು
ಹದವಾಗಿದ್ದರೇ
ಹೂಗಳ ಬೃಂದಾವನವನೇ
ಸೃಷ್ಟಿಸುತ್ತಿದ್ದೆ 

ರಸಸುಗಂಧದಿಂದ ನಿನ್ನ
ಎದೆಯನು ಭರಿಸುತ್ತಿದ್ದೆ

ಎಸಳುಗಳ ಕಾಂತಿಯಿಂದ
ನವಿಲನು ನಾಚಿಸುವ
ಬಿಲ್ಲನು ಮೀರುವ
ರಂಗನು ಬಳೆಯುತ್ತಿದ್ದೆ

ನಿರ್ಮಲ ಪ್ರೀತಿಯ
ಕಾಂತೀಯ ಕಣ್ಣೊಳು ತುಂಬಿ
ಜಗವನೆಲ್ಲವ ಸುಂದರವಾಗಿಸುತ್ತಿದ್ದೆ
ನಿನ್ನರಿವಿಗೆ ಬರುವಂತೆ
ಪ್ರೇಮದ ಬೇರು ಇಳಿದು
ಕನಸಿನ ಟೊಂಗೆ
ಟಿಸುಲೊಡೆಯುವಂತೆ
ಚಿಗುರುತಿದ್ದೆ