ತೊಡೆಯ ಚರ್ಮವ ಕೆತ್ತಿ
ಹದವಾಗಿ ತೊಗುಲನು ತಟ್ಟಿ ತಟ್ಟಿ
ಅಣ್ಣನ ಕಾಲಿಗೆ ಮೆಟ್ಟನು ಮಾಡಿದ
ಹರಳಯ್ಯನಂತಹ ಭಕ್ತನು ನಾನಲ್ಲ
ಮಗನ ಶಿರವನೆ ಕತ್ತರಿಸಿ
ಒರಳೊಳು ಹಾಕಿ ಕುಟ್ಟಿ ಕುಟ್ಟಿ
ಹರನಿಗೆ ಎಡೆಯ ಮಾಡಿಕೊಟ್ಟ
ಸಿರಿಯಾಳನಂತಹ ಭಕ್ತನೂ ನಾನಲ್ಲ
ಹರನ ಕಣ್ಣೀರಧಾರೆಯ ತಡೆಯಲು
ಶರದಿಂದ ತನ್ನೇರಡು ಕಣ್ಣನೇ ಕಿತ್ತಿ ಒತ್ತಿ
ಶಿವನಿಗೆ ಕಣ್ಣನು ನೀಡಿದ ಬೇಡರ ಕಣ್ಣಪ್ಪನಂತಹ
ಭಕ್ತನೂ ನಾನಲ್ಲ
ಬಸವಣ್ಣನವರ ವಚನಗಳ ಉಳಿಸಲು
ಆಸ್ತಿಯ ಮಾರಿ ಅಚ್ಚುಯಂತ್ರದಿಂದ
ಅಣ್ಣನ ವಚನವ ನಾಡಿಗೆ ನೀಡಿದ
ಫ.ಗು. ಹಳಕಟ್ಟಿಯಂತಹ ಭಕ್ತನೂ ನಾನಲ್ಲ
ನಾನೊಬ್ಬ ಕನ್ನಡದ ಕರು
ಈ ಮಣ್ಣಲಿ ಹುಟ್ಟಿದ ಚಿಕ್ಕ ಗರಿಕೆ
ಕನ್ನಡವ ಮನದಲಿರಿಸಿ ತನುವ
ನಾಡಿಗರ್ಪಿಸುವ ಧೂಳು ಕಣದೊಳಗಿನ
ಚಿಕ್ಕ ಕಣದ ಸೇವಕನು
No comments:
Post a Comment