ನಲ್ಲನಿಗೆ

ನನಗೆ ಗೊತ್ತು ರಸಿಕ
ಮುಂಗುರುಳ ಸರಿಸುವ ನೆಪದಲ್ಲಿ
ನನ್ನ ಕೆನ್ನೆಯ ಸವರಿ ಕೆಂಪಗಾಗಿಸಿದ್ದು
ಕಸ ಊದುವ ನೆಪದಲ್ಲಿ ಕಂಗಳಲಿ
ನಿನ್ನ ರೂಪವೆ ತುಂಬಿ ರಾತ್ರಿಯ ನಿದ್ದೆಗಳ
ಬರವಾಗುವಂತೆ ಮಾಡಿದ್ದು
ನೆರಿಗೆಗಳ ಸರಿ ಮಾಡುತ್ತ ನನ್ನ ನಡುವನು
ಬಳಸಿದ್ದು
ತೂಗು ತೊಟ್ಟಿಲ ಕಂದನಿಗಿಂತಲೂ ನಿನ್ನ
ಮಡಿಲಲಿ ನನ್ನ ಮಗುವಾಗಿಸಿದ್ದು
ಬಿಸಿಲಿಗುರಿಯುವ ಅಂಗಾಲುಗಳ ಊದಿ
ಊದಿ ಆರೈಸಿದ್ದು
ನನ್ನ ಮದುವೆ ದಿನ ನಿನ್ನದೊಂದು
ಮಾತಾದರೂ ಸಾಕಿತ್ತು
ಸನ್ನೆಯಾದರು ನೀಡಬೇಕಿತ್ತು
ನಿನ್ನ ಪ್ರೇಮ ಸಿರಿಯ ಮುಂದೆ
ಆ ವೈಭೋಗದ ಸಿರಿ ಎಷ್ಟು ತೂಕ
ಕರೆಯದೆ ಹೋದೆಯಲ್ಲ
ಇದು ನಿನಗೆ ಸರಿಯೆ?