ಅವಳೆಂದರೆ

ಅವಳೆಂದರೆ ಹಾಗೆ....
ವಸಂತ ಮಾಸದ ಕೋಗಿಲೆಯ ಹಾಗೆ...
ವಿರಹ ವೇದನೆ ಗೀತೆಯ ಮರೆಸಿ
ಪ್ರೇಮಗೀತೆಯ ಹಾಡುವಾಕೆ...

ಅವಳೆಂದರೆ ಹಾಗೆ.....
ಶ್ರಾವಣ ಮಾಸದ ಜೋಕಾಲಿಯ ಹಾಗೆ...
ತನ್ನೆಲ್ಲ ನೋವುಗಳ ಹಿಂದಕ್ಕೆ ತಳ್ಳಿ
ನನ್ನ ನಲಿವುಗಳಿಗೆ ಮುಂದಕ್ಕೆ ಜೀಕುವಾಕೆ..

ಅವಳೆಂದರೆ ಹಾಗೆ...
ಆಷಾಡ ಮಾಸದ ದಿನಗಳಿದ್ದ ಹಾಗೆ...
ಕರಗಲಾರದ ಹಗಲುಗಳ ಬಿಟ್ಟು
ನಿದ್ರಿಸಲಾರದ ರಾತ್ರಿಗಳ ನೀಡುವಾಕೆ...

ಅವಳೆಂದರೆ ಹಾಗೆ.....
ಕಾರ್ತಿಕ ಮಾಸದ ಹುಣ್ಣಿಮೆಯ ಹಾಗೆ
ತಮ ತುಂಬಿದ ಮನಕೆ, ತಮ ಹೊದ್ದೀಹ
ಬಾಳ ಹಾದಿಗೆ ಹೊಂಬೆಳಕ ಚೆಲ್ಲುವಾಕೆ