ಸ್ನೇಹಿತರು

ಸ್ನೇಹಿತರು.. ನಾವು ಸ್ನೇಹಿತರು
ಹೆಗಲಮೇಲೊಂದು.. ಹೆಗಲಿಗೆ ಕೈ ಹಾಕಿ
ಊರ ಬೀದಿ ಹೊಲಗದ್ದೆಗಳ ಉಳಿಸದೆ ಬಾಕಿ
ಹಾದಿಗೆದುರು ಬಿದ್ದವರ ಸೋಲಿನ ಪ್ರಪಾತಕೆ ನೂಕಿ
ಜಾತ್ರೆ ಜಪ್ಪಡಿಗಳಲ್ಲಿ ಕುಣಿದು ಕುಪ್ಪಳಿಸಿ ಕೇಕೆ ಹಾಕಿ
ರಜೆಯ ದಿನಗಳಲ್ಲಿ ಮಜೆಯ ಜೋಕಾಲಿಯ ಜೀಕಿ
ಬದುಕಿನೊಳಗೆ ವಿಸ್ಮಯದ ಕ್ಷಣಗಳ ಕೆತ್ತಿಡುವ ಶಿಲ್ಪಿಗಳು

ಸ್ನೇಹಿತರು... ನಾವು ಸ್ನೇಹಿತರು
ಪರೀಕ್ಷೆಯಲ್ಲಿ ಹಿಂದೆ ಬಿದ್ದವನಿಗೆ ಕಾಫಿ ತೋರಿಸಿ
ಬದುಕಲು ಬೇಕಾಗುವ ಪತ್ರಗಳ ಜಯಿಸಿ
ಜಿಂಕೆ ಕಂಗಳಿಗೆ ಸೋತವನನ್ನು ಬಲೆಯಲ್ಲಿ ಬಿಳಿಸಿ
ಅವನ ಪಾಲಿನ ಒದೆಗಳನ್ನು ನಾವಿಷ್ಟು ಅನುಭವಿಸಿ
ಭಾವನೆಗಳನರಿಯದ ವಾಸ್ತವಲೋಕವ ಎದುರಿಸಿ
ಕೋಮಲಾಂಗನೆಯ ಕೊರಳಿಗೆ ತಾಳಿಯ ಕಟ್ಟಿಸಿ
ಹೀಗೂ ಬದುಕಿ ಬಾಳಬಹುದೆಂಬುದನು ಹೇಳುವೆವು ಸೊಸಿ
ಬರಡಾದ ನೆಲದಲ್ಲೂ ಸಂಜೀವಿನಿಯನ್ನು ಬೆಳೆಯುವ
ಬೆಳೆಗಾರರು

ಸ್ನೇಹಿತರು... ನಾವು ಸ್ನೇಹಿತರು
ಗಾಡಿ ಗುದ್ದಿ ಬಿದ್ದವನಿಗೆ ಆಸ್ಪತ್ರೆಯಲ್ಲಿ ರಕ್ತವ ನೀಡಿ
ಅವನು ಬದುಕಿ ಬರಲೆಂದು ಸಾಮೂಹಿಕ ಪ್ರಾರ್ಥನೆ ಮಾಡಿ
ಕಿವಿಯ ಕೇಳದ ದೇವರು ಅವನ ಉಸಿರನ್ನು ಕಸಿದು
ಗಂಡನಿಲ್ಲದ ಕಷ್ಟಗಳ ಮೂಟೆಯ ಅವಳಿಗೆ ಹೊರೆಸಿ ನಿಲ್ಲಿಸಿಬಿಟ್ಟನು ಅವನ ಮನೆಯ ಗಾಡಿ..
ನಮ್ಮ ಸಂತೋಷದ ಗುಡಿಸಲಿಗೆ ಬೆಂಕಿಯನಿಟ್ಟು
ನಗುತಿರಬಹುದವನು ಹಾಡಿ ಹಾಡಿ
ಅವನೆ ಕೊಟ್ಟ ಬದುಕಿದು ಸೋಲೊಪ್ಪಿಕೊಳ್ಳುವೆವೆ..
ಗೊತ್ತಿರಲಿರ್ಕಿಕ್ಕಿಲ್ಲ ನಾವೆಂತ ಖಿಲಾಡಿ
ಅಪ್ಪಿದೆವು ನೀನೆ ಕೊಟ್ಟ ತಂಗಿಯೆಂದು ಹಾರಾಡಿ
ಹೊಸಬದುಕ ಕಟ್ಟಿಕೊಟ್ಟೆವು ಸಮಾಜದಲ್ಲಿ ಹೋರಾಡಿ
ಎಂತಹ ಕಷ್ಟಗಳ ಭಾರಕ್ಕೂ ಹೆದರದೆ ಸೋಲದಂತ
ಹೆಗಲುಗಳಿವು

ಸ್ನೇಹಿತರು... ನಾವು ಸ್ನೇಹಿತರು
ನಗುವೆವು... ಅಳುವೆವು... ಕಿತ್ತಾಡುವೆವು...
ಒಂದುಗೂಡುವೆವು... ಊರೂರು ಸುತ್ತುವೇವು
ಆಗದೆಂಬುದನೆಲ್ಲವ ಸಾಧಿಸಿ ತೋರಿಸುವೆವು
ಒಬ್ಬನೊಬ್ಬನ ಸಾಧನೆಗಳಿಗೆ ಮೆಟ್ಟಿಲಾಗುವ
ಸ್ನೇಹಿತರು.. ನಾವು ಸ್ನೇಹಿತರು