ಬರಮುಕ್ತ ನಾಡು

ಏನೀ... ನಿಮ್ಮಿಬ್ಬರ
ಮೊಗದಲಿ ಮಂದಹಾಸ
ಕಾಣುತಿಲ್ಲವೆ.. ಮಣ್ಣ
ಮಕ್ಕಳು ಅನುಭವಿಸುತಿರುವ
ವನವಾಸ
ಅಗುಳಗುಳ ಖೂಳಿಗೂ
ಪಡುತ್ತಿರುವವರಲ್ಲ ಹರಸಾಹಸ
ದುಡಿದುಣ್ಣುವ ಮಕ್ಕಳ ಮೇಲೆ
ಏಕೀ.. ನಿಮ್ಮಿಬ್ಬರ... ಅಟ್ಟಹಾಸ

ಉತ್ತು ಬಿತ್ತಿದ ಬೀಜಗಳೆಲ್ಲ
ಸುಡು ಸೂರ್ಯನ ತಾಪದ ಪಾಲು
ಬತ್ತಿದ ಕೆರೆಯ ದಂಡೆಗುಂಟ ನೀರಿಲ್ಲದೆ
ಪ್ರಾಣಬಿಟ್ಟ ಪಕ್ಷಿ ಸಂಕುಲಗಳ ಸಾಲು
ನಿನ್ನ ಹನಿ ಹನಿಯ ಅಮೃತವು
ಬಿತ್ತುವವನಿಗಾಗುವುದಲ್ಲ ಊರುಗೋಲು
ಮಾಡದಿರು ನಿನ್ನನೆ ನಂಬಿ
ಬದುಕುತಿರುವವರ ಬಾಳು ಬುಡಮೇಲು

ದಯೆತೋರಿ ಹರಿಸಿಬಿಡು ಗಂಗೆಯ
ಹಸಿರಾಗಿ ನಳನಳಿಸು ಜಗದ ಸಂತೆಯ
ತೀರಿಸಬೇಕಿದೆ ತುಂಬಿದ ಗಂಗವ್ವನೊಡಲ
ಬಾಗಿನ ಬಯಕೆಯ
ನಿಗೀಸು ನೀರು.. ನೀರೆಂದು ಬಿಕ್ಕುತಿರುವ
ಜೀವ ಸಂಕುಲದ ಬಾಯಾರಿಕೆಯ
ತಲೆ ಎತ್ತಿ ಬದುಕುವವರೆ.‌‌.. ಹೊಸೆದು
ಕೊಳ್ಳದಿರಲಿ ತಮ್ಮ ಕೊರಳಿಗೆ ಕುಣಿಕೆಯ

ಕಾಲ ಮಿಂಚುವ ಮುನ್ನವೇ.. ಕಣ್ತೇರೆದು
ನೋಡು
ಗಂಗೆಯ ಧರಣಿಗೆ ಹರಿಸಿ ಹಾಡು
ಮುಕ್ತಿಯು ಸಿಗಲಿ ಬದುಕುತಿರುವ
ನಾಯಿ ಪಾಡು
ನಿನ್ಕರುಣೆಯಿಂದ ಕಟ್ಟಬೇಕಿದೆ
ಹೊಸದೊಂದು ಗೂಡು
ಕೊಟ್ಟ ಭಿಕ್ಷೆಯಲಿ ಬಲಪಡಿಸಿ ರಟ್ಟೆಯ
ಕಟ್ಟಬೇಕಿದೆ ಬರಮುಕ್ತ ನಾಡು