ಉತ್ತರ ತತ್ತರ

ಉತ್ತರ ತತ್ತರ  ಎನ್ನುವವರು ಬಲು ಎತ್ತರ
ನೀಡುವುದಿಲ್ಲಾವ ಸಮಸ್ಯೆಗಳಿಗೆ ಉತ್ತರ
ಬಿಟ್ಟುಕೊಳ್ಳುವುದಿಲ್ಲಾರು ಜನರನ್ನು ಹತ್ತಿರ
ಹರಿಸುವುದೊಂದಿದೆ ಅದು ನಮ್ಮ ನೆತ್ತರ

ತುಂಬಿಸಿಕೊಳ್ಳುತ್ತಾರೆ ತಪ್ಪದೆ ಮನೆಯ ಕರ
ಮನೆಯ ನಲ್ಲಿ ತಿರುಗಿಸಿದರೆ ಅದಕು ಬರ
ಕೇಳಲು ಹೋದರೆ ಇವರದು ಬರೇ ನಿರುತ್ತರ
ಇವರ ಕಾರ್ಯ ವೈಖರಿ ಕಂಡು ಜನರು ನಿಂತಿಹರು ಬಡಿದಂತೆ ಗರ

ಮಹಾದಾಯಿಯ ಕೂಗು ಕೇಳುತ್ತಿಲ್ಲ ಸರಕಾರ
ಮೂರು ರಾಜ್ಯಗಳು ತೋರುತ್ತಿಲ್ಲ ಸಹಕಾರ
ಧರಣಿ ಉಪವಾಸವ ಕೈಗೊಂಡಿಹನು ಮತದಾರ
ಬರಲಿಲ್ಲಾವ ಆಡಳಿತದ  ಸಾಹೇಬ ಸರದಾರ

ಮೇವು ನೀರಿಲ್ಲದೆ ಒದರುತಿವೆ ದನಕರ
ಭುವಿಯನು ಕಾದಕೆಂಡವಾಗಿಸುತಿಹನು ದಿನಕರ
ಸಭೆಯಲ್ಲಿ ತಣ್ಣಗೆ ಕುಳಿತವರಿಗಿಲ್ಲವೆ ಕನಿಕರ
ನಿದ್ರೆಗೆ ಜಾರಿ ಹೊಡೆಯುವರು ಗೊರಕೆ ಭಯಂಕರ

ಒಂದನ್ನಾದರೂ ಬಿಡುವುದಿಲ್ಲ ಸತ್ಕಾರ
ಹರಿಸುವರು ಮಾತಿನಲಿ ಭರವಸೆಗಳ ಭರಪೂರ
ಭರವಸೆಯ ಆಸೆಗೆ ಹೊಡೆದಾಡಿ ಸಾಕಷ್ಟು ಮಂದಿ ಸತ್ತಾರ
ಸೌಧದ ಮೊಗಸಾಲೆಯಲಿ ನಿಂತು ಮುಸುಮುಸು ನಕ್ಕಾರ

ನಮ್ಮ ಬೆಳೆಗಿಲ್ಲ ಮಾರುಕಟ್ಟೆಯಲ್ಲಿ ದರ
ಬೆಂಬಲ ಬೆಲೆಗೆ ಕೈಗೊಂಡಿಲ್ಲಿನ್ನೂ ನಿರ್ಧಾರ
ಹರಿಸಬೇಕು ಇನ್ನೇಷ್ಟು ದೇಹದ ಬೆವರ
ಇನ್ನೇಷ್ಟು ಸುರಿಸಬೇಕು ಬರದ ಕಣ್ಣೀರ

ಉತ್ತರದವರಿಗಿಲ್ಲವೇ ಯಾವುದೇ ಪರಿಹಾರ
ತೋರಿಸದಿರಿ ನಮಗೆ ಕಿಂಚಿತ್ತು ಮಮಕಾರ
ಹರಿಸಿರಿ ಕಾಲುವೆಗಳಿಗೆ ಮಹಾದಾಯಿ ನೀರ
ಹೊಲಗದ್ದೆಗಳ ಮಾಡುವೆವು ಬಿತ್ತಿ ಬಂಗಾರ

ನೀನಾದರೂ ಕಣ್ತೆರದು ನೋಡೊ ಹರಿಹರ
ತಾಯಿ ಗಂಗೆಯನಾದರೂ ಸುರಿಸು ಸರಸರ
ಸಕಲಜೀವಿಗಳ ಜೀವಕ್ಕಾಗಿ ಹರಿಯಲಿ ಪನ್ನೀರ
ಜಗವ ಕಾಯುವ ಜಗದೀಶನೆ ನೀನಾದರೂ
ತೋರು ಚಮತ್ಕಾರ

ಸ್ವೀಕರಿಸು ನಮ್ಮ ಧೀರ್ಘದಂಡ ನಮಸ್ಕಾರ
ಶಿಕ್ಷಿಸು ಬೆತ್ತವ ಬೀಸಿದ ನೀರ್ಧಯಿ ಪುಂಡರ
ನೀನಾಗು ನೋವುಂಡ ಮನಸಿಗೆ ಆಧಾರ
ಕಣ್ಣೀರ ಒರೆಸಿ ತೋರಿಸು  ಆದರ

ಯಾರಾದರೂ ಹೇಳಿರಿ
ಉತ್ತರಕ್ಕೆ ಉತ್ತರ 

ಯಾಕೆಂದರೆ ಉತ್ತರ
ಈಗ ತತ್ತರ
ಬರದ ಬವಣೆಗೆ ನಿರುತ್ತರ