ನೀನಿಲ್ಲದ ಮನ

ನೀನಿಲ್ಲದ ಮನೆ
ನೀರಿಲ್ಲದ ಕೆರೆಗೆ ಬಾಯಾರಿ
ಬಂದ ಹಸುವಿನಂತಾಗಿದೆ

ನೀನಿರದ ಸಂಜೆಗಳು
ಹಿಂಡಿನಿಂದ ಬೇರ್ಪಟ್ಟ ಕಿರುಚುತ
ಹಾರುವ ಗಿಳಿಯಂತಾಗಿದೆ

ನೀನಿರದ ಸಮಯ
ಮುಳ್ಳುಗಳೆ ಇರದ ಗಡಿಯಾರವು
ನಿಂತಿರುವುದೊ ಓಡುತಿರುವುದೊ
ಚಲನೆಯಿಲ್ಲದಂತಾಗಿದೆ

ಮಾತುಗಳಿಲ್ಲದ ಕೋಣೆ
ಬೆಟ್ಟದಲಿ ಸಿಡಿಮದ್ದು ಸಿಡಿದು
ತೆಳೆಯುವ ನಿಶ್ಯಬ್ದದಂತಿದೆ

ಹೆಜ್ಜೆಗಳ ಸದ್ದಿಲದ ವರಾಂಡ
ಕಾಲಿಗೆ ಗೆಜ್ಜೆಯ ಕಟ್ಟದೆ ನರ್ತಿಸುವ
ರಂಗಮಂದಿರದಂತಾಗಿದೆ

ನೀನಿರದ ಈ ಮನ
ಉಸಿರಾಟ ನಿಂತು ಎದೆಯ
ನೆತ್ತರೆಲ್ಲ ಹೆಪ್ಪುಗಟ್ಟಿದಂತಿದೆ