ಮಲಗದಿರಿ ಕವನಗಳೆ

ಮಲಗದಿರಿ ಕವನಗಳೆ
ಯಾವ ಯಾರದೂ ಚಿಂತೆಯಿಲ್ಲದಂತೆ
ಬರೆಯುವ ಕೈ ಬರಿದಾಗುವಂತೆ
ಮಥಿಸುವ ಮಸ್ತಿಷ್ಕ ಮಂಕಾಗುವಂತೆ
ಮಲಗದಿರಿ ಕವನಗಳೆ

ಚಿಮ್ಮಿ ನೆಲಕೆ ಹರಿದು ಹಳ್ಳಕೆ
ಚಿಗುರ ಹೊಮ್ಮಿಸಿ ಮರವ ತುಂಬಿಸಿ
ನೆಲಕೆ ಹಸಿರು ಬಣ್ಣದ ಚಿತ್ತಾರವ
ಬಿತ್ತುವ ಹನಿಗಳೆ ಇಳೆಗೆ ಜಾರದೆ
ಮೋಡದ ತೆಕ್ಕೆಗಳಲಿ ನಿದಿರೆಗೆ
ಜಾರಿದಂತೆ

ಚಿಟ್ಟನೆ ಚೀರಿ ತಾಯನು ನಿದ್ದೆಯಿಂದೆಬ್ಬಿಸಿ
ಎದೆಹಾಲ ಕುಡಿದು ಆನಂದದಿ ಆಟವಾಡಿ
ತಾಯಿಗೆ ನಿದ್ದೆಹತ್ತಗೊಡದಂತೆ ಗೋಳಾಡಿಸಿ
ಕೈಯ ನೋವು ಬರುವವರೆಗೂ ಅವಳಿಂದ
ತೊಟ್ಟಿಲ ತೂಗಿಸಿ ಆಸೆಗಳಿರದ ಕನಸುಗಳ
ನಿದ್ರೆಗೆ ಹೊಕ್ಕಿಬಿಡುವ ಮಗವು ಇವೆಲ್ಲದರ
ಮಜಲುಗಳ ಮರೆತು ಮಲಗಿದಂತೆ

ಮಲಗದಿರಿ ಕವನಗಳೆ
ತಾಯಿ ಮಡಿಲೊಳ ಮಗುವಂತೆ
ವರನ ತೊಳೊಳ ವಧುವಿನಂತೆ
ಹರನ ಶಿರದೊಳ ಗಂಗೆಯಂತೆ
ಹೂವಿನೆದೆಯೊಳ ಗಂಧದಂತೆ