ರಾಗರಸದ ಗಂಗೆ

ನಲ್ಲ
ನೀ ಕೊಟ್ಟ ಗುಲಾಬಿಯ
ಎಸಳುಗಳು ಒಣಗಿ
ಉದುರಿದರು
ಅದರ ಕೆಂಪು ರಂಗು
ಇನ್ನೂ ಅಚ್ಚಳಿಯದೆಯಿದೆ

ನಂಜಾ
ತುರುಬಿಗಿಟ್ಟ ಮಲ್ಲಿಗೆ
ಮಲಗಿದೆ ಮೈಸೋರಿ
ರಸದ ಕಂಪು ಮನಕೆ
ಸೋರಿ ಹೆಪ್ಪಾಗಿದೆ

ಸಖ
ಸವಿದ ಸುಖದ ಹೊತ್ತುಗಳು
ಸೊರಗಿ ಸೊರಗಿ ಸೊರಗಿ
ನೀರಾಗುತಿವೆ ಹತ್ತಿಯ
ಶಯನದ ಸ್ವಪ್ನಗಳಲಿ

ದೀನ
ಕಳೆದ ದಿನಗಳು ನಿಮಿಷಗಳಾಗುತಿವೆ
ನೀನಿರದ ಈ ಕ್ಷಣ
ಉರಿಸಿ ಕಾಯಿಸಿ ಬೇಯಿಸಿ
ಒಣಹಾಕುತಿವೆ ಅನುಕ್ಷಣ

ರಾಂಗ
ರಾಗವ ಮೀಟಲು ಕಾಯುತಿದೆ
ಏರುಇಳುವಿನ ಅಂಗ ಸಾಧನಗಳು
ಮೀಟಿ ಮೀಟಿ ಮೀಟಿ
ಸುರಿಸಿ ಹರಿಸು ರಾಗರಸದ
ಗಂಗೆಯ