ನಮ್ಮವ್ವ ೧೨

ಹರಿದ ಬಟ್ಟೆಗೆ ತ್ಯಾಪಿ ಮಾಡತಾರ
ತುಂಡಾದ ನೋಟಿಗೆ ಅಂಟ ಹಚ್ಚತಾರ
ಮುರದ ಬಿದ್ದ ಜಂತಿಗೆ ಮಳಿ ಬಡಿತಾರ
ನೋಡವ್ವ
ನನ್ನ ಬಾಳೆ ಅನ್ನೊ ಭಾಗ್ಯದ ಬಾಗಿಲಿಗೆ
ಕದಗಳೆ ಇಲ್ಲದಾಗ ಏನ ಕುಂದರ್ಸತಾರ
ನಮ್ಮವ್ವ

ಹಸಿದ ಬಂದವಂಗ ಅನ್ನ ನೀಡ್ತಾರ
ಬಾಯಾರಿ ನಿಂತವಗ ನೀರss ಹಾಕ್ತಾರ
ಸೂರಿಲ್ಲದವಗ ಮಲಗಾಕ ಜಾಗ ಕೊಡ್ತಾರ
ನೋಡವ್ವ
ಹಸಿರ ಬಳೆ ಬೇಡಿ ಹೋದಾಕಿಗೆ
ಕಬ್ಬಿಣದ ಬೇಡಿ ಹಾಕ್ಯಾರೊ
ನಮ್ಮವ್ವ

ಹಾರೊ ಹಕ್ಕಿನ ತಂದು ಕೂಡಿ ಹಾಕ್ಯಾರು
ಜಿಗಿಯೊ ಕರುನ ಬಿಗದ ಗೂಟಕ್ಕ ಕಟ್ಯಾರು
ಹಾಲ ನೀಡೊ ಹಸುನ ಕಟಕನಿಗ ದಬ್ಯಾರ
ನೋಡವ್ವ
ಉಂಡ ತಿಂದ ಆಡೊ ವಯಸ್ಸನ್ಯಾಗ ಮದುವಿ
ಅನ್ನೊ ಸಂಸಾರದ ಹಗೆಕ ದೂಡ್ಯಾರೊ
ನಮ್ಮವ್ವ