ನಮ್ಮವ್ವ ೧೩

ಹರಿಯೊ ಹೊಳಿಯಾಗ ಮುಳಗತಾರ
ನಿಂತ ಕಲ್ಯಾಣಿಯೊಳಗ ಸ್ನಾನ ಮಾಡ್ತಾರ
ಸುರಿಯೊ ಮಳಿಗೆ ಮೈ ಮರತ ನಿಂದರತಾರ
ನೋಡವ್ವ
ಯಾವ ನೀರನ್ಯಾಗ ತೊಯ್ದರನು ಮೈಯನ
ಕೊಳಿ ಹೊಕ್ಕೈತಿ ಮನಸನೆಂದ ಕಲಿ
ಕರಗತೈತೇನ
ನಮ್ಮವ್ವ

ಕುಂತ ದೇವ್ರಿಗೆ ಕೈ ಮುಗಿತಾರ
ನಿಂತ ದೇವ್ರಿಗೆ ಅಡ್ಡ ಬೀಳ್ತಾರ
ಮಲಗಿದ ದೇವ್ರಿಗೆ ಊರಳ ಸೇವೆ
ಮಾಡ್ತಾರ
ನೋಡವ್ವ
ಮನದ ದೇವರ ಮರತ ಬಾಳೆ
ಮಾಡ್ತಾರ
ನಮ್ಮವ್ವ

ಬಂಗಾರ ಬೆಳ್ಳಿನ ಹುಂಡಿಗೆ ಹಾಕ್ತಾರ
ಗಂಟ ಕಟ್ಟಿ ಕಟ್ಟಿ ಜೋಳಿಗ್ಗೆ ಸುರಿತಾರ
ಚಿಲ್ಲರ ಹಣವನ್ನ ತುಲಾಭಾರಕ್ಕೆ ತುಂಬಸ್ತಾರ
ನೋಡವ್ವ
ಗುಡಿಮುಂದ ಕುಂತ ಬಿಕ್ಷುಕನಿಗೆ ಹಾಕಾಕ
ಇವರ ಹತ್ರ ಚಿಲ್ಲರೆ ಇರಲ್ಲಲ್ಲೊ
ನಮ್ಮವ್ವ