ಸಾಲಿಗೆ ಹೋಗೊ
ಪುಸ್ತಕದ ಚೀಲಾನ
ಹೊರಲಾರ್ದಂತ
ಎಸಳು ಹೆಗಲುಗಳು
ನನವು,
ಕೇಳವ್ವ....
ಸಂಸಾರ.... ಅನ್ನೊ
ನೊಗದ ಭಾರಾನ,
ಹೊರಿಸಿ ಕೈ
ಬಿಟ್ಟಾರಲ್ಲೊ
ನಮ್ಮವ್ವ....
ಅವ್ವನ ಮಡಿಲಾನ
ಬೆಚ್ಗ ಮಲ್ಗೊ.....
ಸುಖಾನ ನಾನಿನ್ನು
ಸವಿದಿಲ್ಲ
ಗೊತ್ತೆನವ್ವ.....
ಮತ್ತೊಬ್ನ ದೇಹದ
ಬಿಸಿ...ತಣಿಸಾಕ
ಕತ್ಲ...ಕೋಣಿಗೆ
ದೂಡಿಬಿಟ್ಟಾರಲ್ಲೊ
ನಮ್ಮವ್ವ ....
ಕುಂಟೆಬಿಲ್ಲೆ ಆಡೋ
ವಯಸ್ಸನ್ಯಾಗ
ಗಂಡನ ಮನಿ ಹೊಸ್ಲ
ದಾಟ್ಸಿದ್ರಲ್ಲೊ
ನಮ್ಮವ್ವ ....
ಬಿಂದ್ಗಿ ಕೊಡಾನ...
ಹೊರಲಾರ್ದ ನಡುವನ್ಯಾಗ
ಉಸಿರಾಡೊ ಗೊಂಬಿ
ಕೊಟ್ಟಾರಲ್ಲೊ
ನಮ್ಮವ್ವ ...
🐃🐃🐃🐃🐃
ಧರ್ಮದ ಹೆಸರನ್ಯಾಗ
ಹಸಿ ಮಾಂಸಾನ,
ತಿಂದ ತೇಗಿದ್ರಲ್ಲೊ
ನಮ್ಮವ್ವ....
ಶಾಂತಿಯನ್ನೊದು
ಹುಗ್ದ ಮಣ್ಣೊಳ್ಗು
ಸಿಗವಲ್ದಲ್ಲೊ...
ನಮ್ಮವ್ವ
ಕಾಮದ ಕಾವಿಗೆ
ಸುಟ್ಟು...ನಾನೇನೊ
ಬೂದಿಯಾಗ್ಹೋದೆ
ಕೇಳವ್ವ......
ಹೆತ್ತೊಡಲು ದಿನಾನು
ನನ್ನ ನೆಪನ್ಯಾಗ
ಕಣ್ಣೀರಾಗ ಕೈ
ತೊಳೆಯಾಕ್ಹತ್ತಾವು
ಒರೆಸೊರಾದ್ರು
ಯಾರವ್ವ...
ಜಗತ್ತು ಇಷ್ಟು
ಕ್ರೂರಿ ಐತೆಂದು
ಗರ್ಭದಾಗಿದ್ದಾಗ್ಲೆ
ಯಾಕರ ನಿ...ಹೇಳ್ಲಿಲ್ಲೊ
ನಮ್ಮವ್ವ...
ಮೊದ್ಲ ಹೇಳಿದ್ರ,
ಅರಳೊ ಮೊದ್ಲ
ಅಲ್ಲೆ ಕಮರಿಬಿಡ್ತಿದ್ನಲ್ಲೆ
ನಮ್ಮವ್ವ...
🐶🐶🐶🐶🐶🐶
ಮಳಿ..ಮಳಿ..ಅಂದ
ಮುಂಗಾರು ಮಸಣ
ಕಾಣ್ತೋ...
ಕೇಳವ್ವ
ಹಿಂಗಾರಿ ಮಳಿನೂ ಇಲ್ಲ..
ಛಳಿನು ಇಲ್ಲ...
ಬಿತ್ತಿದ ಭಾಳೆ ಹಳಿಸಿ
ಹೊಂಟೈತಲ್ಲೊ
ನಮ್ಮವ್ವ
ಉತ್ತಿ...ಬಿತ್ತಿದ
ಬೆಳೆಗೆಲ್ಲಾ...
ಹುಳಾ ಬಿದ್ದ ಹೊಂಟಾವು
ನೋಡವ್ವ....
ಹೊಟ್ಯಾಗ.. ಹುಟ್ಟಿದ
ಹುಳುಗಳ ಬಾಯಿಗೆ
ಏನ್ ಮಣ್ಣ
ಸುರಿಬೇಕೊ...ಹ್ಯಾಂಗೊ
ನೀನೆ ಹೇಳವ್ವ
ಸಾಲದ ಭಾರಾನ
ಹೊತ್ತ...ಹೊತ್ತು...
ಹೆಗಲನ್ನೊವೊ
ಮೆತ್ತಗಾಗ್ಯಾವು
ಗೊತ್ತೆನವ್ವ...
ಭೂಮಿಗೆ ಭಾರ
ಅನ್ಕೊಂಡ, ಗೋಣಿಗೆ
ಕುಣ್ಕಿ ಹೊಸೆಯೊ
ಮುಂಚಾದ್ರು ಕೈ
ಹಿಡಿದೆತ್ತೊ...
ನಮ್ಮವ್ವ
🐮🐮🐮🐮
ಕಷ್ಟಾಪಟ್ಟ..ದುಡ್ದಿದ್ದೆಲ್ಲಾ..
ಮಳೆ ನೀರಿಗೆ
ಕೊಚ್ಗೊಂಡ
ಹೋತಲ್ಲೆ...
ನೋಡವ್ವ....
ಕ್ವಾಟಿನೂ ಇಲ್ಲ..
ಗುಡ್ಸಲಾನು ಇಲ್ಲ,
ಬದ್ಕು ಹಾದಿಗೆ
ಬಂದ್ಬಿತ್ತಲ್ಲೊ...
ನಮ್ಮವ್ವ..
ಮಡಿ...ಮಡಿಯೆಂದು
ಮಹಡಿ ಮನಿಯೇರಿ
ಕುಂತೋರ ಮನಿಗೆ...
ಊರಾನ ಕೇರಿ ತೊಳ್ದ
ನೀರು.. ಇವ್ರ ಹಟ್ಟಿಗೆ
ಹೊಕ್ಕೈತಿ..
ನೋಡವ್ವ..
ದೇವ್ರ ಕೋಣ್ಯಾನ ಬೆಳ್ಳಿ
ಮೂರ್ತಿ ನೆತ್ತಿನ...
ತೊಯ್ಸತೈಲ್ಲೊ
ನಮ್ಮವ್ವ...
ಶೀಲಾ....ಶೀಲಾ.. ಅಂದ್ಕೊಂಡ,
ಊರಾನ ಮನಿ ಹಾಳ ಮಾಡೋರ
ಬಾಯಿಗೆ ಹಿಡಿ ತುತ್ತಿಲ್ಲ...
ಕೇಳವ್ವ...
ಸೀರಿ ಸೇರ್ಗ ಹಾಸಿ,
ದುಡ್ಡ ಮಾಡ್ದಾಕಿ ಕೊಟ್ಟ
ರೊಕ್ಕದಿಂದ.... ತುತ್ತ ತಿನ್ನೊ
ಗತಿ ಬಂತಲ್ಲೊ
ನಮ್ಮವ್ವ
ಹೊಟ್ಟಿ ಹಸ್ವಿಗೆ
ಮಂದಿ ಮುಂದ
ಕೈ ಚಾಚೊ...ಜೀವಾನ
ಆ ಶಿವ ಇನ್ನು
ಯಾಕಾರ
ಇಟ್ಟಾನೊ...
ನಮ್ಮವ್ವ...
ಸುರ್ದ್ ಮಳಿ...ಕುಸ್ದ್ ಮಣ್ಣು
ಉಸರನ್ನರಾ..
ಕಸ್ಕೊಂಡ ಹೋಗ್ಲಿಲ್ವಲ್ಲೆ...
ನಮ್ಮವ್ವ...
🐽🐽🐽🐽🐽
ಗಲ್ಲಿ.. ಗಲ್ಲಿಯೊಳಗು
ಜಾತಿಯ
ಝೆಂಡಾ ಕಟ್ಯಾರು
ನೋಡವ್ವ..
ಯಾವ ಝೆಂಡಾದ
ನೆರಳಾಗ ಕುಂತ್ರೇನ ಬಂತು..
ಮುಕ್ತಿಯನ್ನೊದ
ಸಿಗುವಲ್ದ ಆಗೈತೆಲ್ಲೊ
ನಮ್ಮವ್ವ
ಮೂಲಿ...ಮೂಲಿಗೊಂದು
ಗುಡಿ ಗುಂಡಾರ ಕಟ್ಟಿ
ದೀಪಾ ಹಚ್ಚ್ಯಾರ
ನೋಡವ್ವ
ಎದ್ಯಾನ ಗುಡಿನ
ಹಾಳ್ಗೇಡವಕೊಂಡ
ತಾವ ಕತ್ಲದಾಗ ಕುಂತಾರಲ್ಲೊ
ನಮ್ಮವ್ವ
ಸುರಿಯೊ ಮಳಿಗೆ
ಜಾತಿಲ್ಲಂತಾರ...
ಹರಿಯೊ ನದಿಗ್ಯಾಕ
ಹೆಸರಿಟ್ಟಾರು
ಹೇಳವ್ವ
ಬಿತ್ತೊ... ಬೆಳಿಗೆ
ಹೆಸರಿಡ್ತಾರು...
ಹಸಿಯೊ ಹೊಟ್ಟಿಗೆ
ಏನಂತ ಹೆಸರಿಡ್ತಾರೊ
ನಮ್ಮವ್ವ
🐰🐰🐰🐰🐰🐰
ಕರಿಕಲ್
ದ್ಯಾವ್ರ ನೆತ್ತಿ
ಮ್ಯಾಲೆ
ಎಣ್ಣಿ ಸುರಿತಾರ
ತಣ್ಣಗಾಗ್ಲೆಂತಂದ
ನೋಡವ್ವ
ಹಸಿದೊಡಲ
ನಾಯಿ...
ಎಣ್ಣಿನೆಲ್ಲ
ನೆಕ್ಕಿ....
ದೇವ್ರನ್ನೆ
ಎಂಜ್ಲಾ ಮಾಡಿತ್ತ
ನೋಡವ್ವ
ಧರ್ಮಕ್ಕೊಂದೊಂದು
ಬಣ್ಣಾ..ಬಣ್ಣದ
ಬಟ್ಟಿ ಕಟ್ಗೊಂಡ
ಬಡ್ದಾಡ್ಕೊಂತ
ಕುತ್ಗೊಂಡಾರು
ನೋಡವ್ವ...
ಬಿತ್ತೊ... ಬೆಳಿಯೊಳ್ಗ
ಬಣ್ಣ ಬಣ್ಣದ
ಅನ್ನ ಐತಿ...
ಆರ್ಸಿಕೊಂಡ
ಉಣ್ತಾರೇನೊ
ನಮ್ಮವ್ವ
ಕೋಳಿಗರ್ದ
ಭಕ್ಷಿ.. ಮನಿಯ್ಯಾನ
ಮಸಾಲಿ ವಾಸ್ನಿ...
ಗಾಳಿಗುಂಟ ನಮ್ಮನಿ
ಪಡಸಾಲಿಗೆ ಬಂದಿತ್ತ
ನೋಡವ್ವ...
ವಾಸ್ನಿ
ಹೊತ್ತ ತಂದ
ಗಾಳಿನ ಬೈಕೊಬೇಕೊ
ಏನ್
ಉಸಿರಾಡೋದನ್ನ
ನಿಲ್ಸಬೇಕೊ ಹ್ಯಾಂಗ
ನೀನರ
ಹೇಳವ್ವ
🐁🐁🐁🐁🐁
ಗಂಗಿಯೊಳಗ
ಮುಳುಗೆದ್ರ ಪಾಪ
ಕಳದ್ಹೊಕ್ಕೈತೇನೊ
ನಮ್ಮವ್ವ
ಅಂಗಿಯೊಳ್ಗಿನ
ಕಿಸೆಯಿಂದ ನಾಕಾಣೆ
ಧರ್ಮ ಮಾಡ್ಲಿಲ್ಲಂದ್ರ
ಪುಣ್ಯಾನರ ಹ್ಯಾಂಗ
ಹುಟ್ತೈತೊ
ನಮ್ಮವ್ವ
ಬಿಸೊ...ಬಿರುಗಾಳಿಗೆ
ಬಿದ್ದ್ಹೋಗ ಮರಕ್ಕ
ಸುತ್ತ ಹಾಕಿದ್ರೇನ
ಬಂತೊ
ನಮ್ಮವ್ವ
ಹೆತ್ತ ಜೀವಕ್ಕ
ಎರ್ಡ ಹೊತ್ತು... ತುತ್ತ
ಹಾಕದಿದ್ರ ಏನ
ಬಂತೊ ನಮ್ಮವ್ವ
ಹೊಟ್ಟೆ...ಬಟ್ಟೆ ಕಟ್ಟಿ
ಕುಡಿನ ಶ್ಯಾಣೆನ
ಮಾಡಿ...ಗೂಟದ
ಕಾರನ್ಯಾಗ ಅಡ್ಡಾಡುವಂಗ
ಮಾಡ್ಯಾರು
ನೋಡವ್ವ...
ಹಡ್ದ...ಬೆಳ್ಸಿದ
ಋಣಕ್ಕ...
ಸಾಕಲಾರ್ದ್ನ
ಆಶ್ರಮಕ್ಕ ಬಿಟ್ಟ
ಬರೊ ಇವ್ರ
ಶ್ಯಾಣೆತನಕ್ಕ
ಏನಂತ ಹೇಳ್ಬೇಕೊ
ನಮ್ಮವ್ವ
🌹🌹🌹🌹🌹🌹🌹
ಕರಿಕಲ್ಲ ದ್ಯಾವ್ತಿಗೆ
ಉಡಿ ತುಂಬಿ..
ಹೆಣ್ಣ ನೋಡಾಕ
ಹೋಗ್ಯಾರು
ನೋಡವ್ವ..
ನೋಡಿದ ಹುಡ್ಗಿ
ಕಪ್ಪಾದಳನ್ಕೊಂಡು..
ಮುಡಿಯಾಕ ಹೂವಾನು
ಕೊಡ್ದ, ಎದ್ದ ಬಂದಾರಲ್ಲೊ
ನಮ್ಮವ್ವ
ಊರಾಗಿನ ಎಲ್ಲಾ
ಹೆಣ್ಣ ದ್ಯಾವ್ರಿಗೆ ಹರ್ಕಿ
ಹೊತ್ಗೊಂಡ ಬರ್ತಾರ
ಸೊಸಿ ಗಂಡ್ಮಗು
ಹಡಿಲೆಂತ
ಕೇಳವ್ವ...
ಸೊಸಿ ಆರಾಮಾಗಿ
ಹೆಣ್ಣ ಹಡದ್ರ...
ಮನೇನ ಜಗ್ಲಿ ಮ್ಯಾಲಿನ
ದೇವ್ರು...ಎರ್ಡ ದಿನ
ದೀಪ ಕಾಣೊದಿಲ್ಲಲ್ಲೊ
ನಮ್ಮವ್ವ
ಹೆಣ್ಣು ಶಕ್ತಿ ದ್ಯಾವ್ತಿ
ಅಂತಂದ ಊರ್ತುಂಬಾ
ಹುಣ್ವಿಗೆ ಪ್ರಾಣಿನ
ಬಲಿ ಕೊಡ್ತಾರು
ನೋಡವ್ವ...
ಹೊಟ್ಟ್ಯಾಗೊಂದು
ಹೆಣ್ ಜೀವಾ ಉಸರೈತಂದ್ರ,
ಪಿಂಡಾ ಬಲಿಯೊ ಮುಂಚೇನ,
ಬಲಿ ತಗೊಂಡ ಬಿಡ್ತಾರಲ್ಲೊ
ನಮ್ಮವ್ವ
🌴🌴🌴🌴🌴🌴🌴
ತುಂಬಿದ ಸೇರ
ಒದ್ದ ಬಂದಾಕಿ
ತುಂಬಿದ ಮನಿನ
ಒಡ್ದಾಳಲ್ಲೊ
ನಮ್ಮವ್ವ
ಹಾಲುಕ್ಕಿಸಿ...
ಸುಖ ತುಂಬ್ತೀನಂದಾಕಿ..
ಮನಿ ಒಡೆಯೊ, ವಿಷದ
ಗಾಳಿನ....ಉಸಿರಾಳಲ್ಲೊ
ನಮ್ಮವ್ವ
ಎಷ್ಟ ಓದಿ..ಡಿಗ್ರಿ
ತಗೊಂಡ್ರೇನಾತ,
ಸಂಜಿತನ್ಕ ....
ಟಿ.ವಿ ಮುಂದ ಕುಂತ್ರ
ಏನ ಬಂತ
ನಮ್ಮವ್ವ...
ಕೈಯ್ಯಾಗ ಬಳಿ
ತೊಟ್ಟಾಕಿ...ಹೊಟ್ಟಿಗೆ
ತಿನ್ನೊ ಅನ್ನಾನ
ರೊಕ್ಕಾ ಕೊಟ್ಟ
ತರ್ಸಿಕೊಂಡ ತಿನ್ನುದ್ರಾಗ
ಏನ ಸುಖ ಐತೊ
ನಮ್ಮವ್ವ
ಪೆಟ್ಗಿ ತುಂಬಾ...
ಬೆಳ್ಳಿ ಬಂಗಾರ ತುಂಬ್ಕೊಂಡ
ಬಂದೀನ ಅನ್ನೊ..
ದೌಲತ್ತು ಛಲೋ ಅಲ್ನೊಡದ
ಹೌದಲ್ಲವ್ವ...
ಹಿಂದ್ಕ ಹಂಡೆ ತುಂಬಾ
ಬಂಗಾರ ತಂದಾಕೀನ, ಇವತ್ತ
ನಿನ್ಮುಂದ.. ಹೊತ್ತ
ಕೂಳಿಗೆ ಕೈ ಚಾಚಿ
ಕೇಳುವಂಗಾಗೈತಿ
ಗೊತ್ತಾಯ್ತೇನವ್ವ
🐎🐎🐎🐎🐎🐎🐎
ಕಷ್ಟ ಅಂತಂದು
ಎಲ್ಲಾದಕ್ಕು...
ದೇವ್ರ ಮುಂದೋಗಿ
ಕೈ ಮುಕ್ಕೊಂಡ
ನಿಂತ್ಕೊಳ್ತಾರು
ನೋಡವ್ವ...
ಪೂಜೆ ಮಾಡ್ಸಿಕೊಳ್ಳೊ
ಕಲ್ಲು... ಪೆಟ್ಟ
ತಿನ್ನಲಾರ್ದನ ದೇವ್ರಾಗ್ಲಿಲ್ಲ
ಅನ್ನೊ ಸತ್ಯಾನ...
ಎಲ್ರೂ ಮರ್ತ ನಿಂತ್ಗೊಂಡ್ರ
ಹ್ಯಾಂಗವ್ವ
ಮೈಕೈ ತಿಕ್ಕಲಾರ್ದ
ಮೈ ಮ್ಯಾಲಿನ
ಹೋಲ್ಸು...
ಹೋಗೊದಿಲ್ಲ
ಹೌದಲ್ಲವ್ವ...
ಇನ್ನ... ಬರೀ ನೀರಾಗ
ಮುಳುಗೆದ್ರ,
ಮಾಡಿದ ಪಾಪಾ
ತೋಳ್ದಹೊಕ್ಕಾವೇನೊ
ನಮ್ಮವ್ವ
ಅದನ್ನ ಕಡಿಬ್ಯಾಡ..
ಇದನ್ನ ಕೊಯ್ಯಬ್ಯಾಡ ಅನ್ಕೊತ
ಎಷ್ಟೊಂದ ಬಡ್ದಾಡ್ಕೊಂಡ
ಸಾಯ್ತಾರಲ್ಲೊ
ನಮ್ಮವ್ವ...
ಯಾವ ಧರ್ಮ ಹೇಳೈತಿ?
ನಿಮ್ಮ ಹಠಕ್ಕ...
ಹೆತ್ತಾಕಿ ಮಡಿಲಾಗ..
ಸಾವಿನ ಕೆಂಡ
ಸುರೀರಂತ
🐯🐯🐯🐯🐯🐯
No comments:
Post a Comment