ಕಾಯುವೆಯಾ ಹುಡುಗಿ

ಹೇಗೆ ತಿರುಗಿ ನೋಡಲೆ.. ಹುಡುಗಿ
ನಾವು ಕಂಡ ಕನಸುಗಳಿಗೆ ಬಲವ
ತುಂಬಲು ನನ್ನ ರೆಟ್ಟೆಗಳಲಿ
ಬಲವಿಲ್ಲದಿರುವಾಗ..

ಹೇಗೆ ಗಟ್ಟಿಗೊಳಿಸಲಿ ಹುಡುಗಿ
ನಮ್ಮ ಹಸಿ ಹಸಿ ಆಸೆಗಳನ್ನು....
ನಾ ನಡೆವ ನೆಲವ ಇನ್ನೂ ಗಟ್ಟಿಯಾಗದಿರುವಾಗ...

ಇದೆ.. ಕಾರಣಕ್ಕಲ್ಲವೆ ನಾ ಹೊರಟಿರುವುದು
ನಮ್ಮಿಬ್ಬರ ಎಸಳು ಮನಸಿನ ಪ್ರೀತಿಯ
ಅರಿಯುವರಾರು ಇಲ್ಲವಿಲ್ಲಿ... ಹಿಡಿದಿಟ್ಟುಕೊ..
ಜಗವ ನಾ ಗೆದ್ದು ಬರುವವರೆಗೂ ಆ ಪ್ರೀತಿಯನು

ಅದಕ್ಕೆಂದೆ ಬಾಳ ಯುದ್ಧ ಗೆಲ್ಲಲು
ಹೊರಟಿರುವೆ ಬೆಡಗಿ.. ನಾವು ಸವಿದು
ಉಣ್ಣುವ ಈ ಪ್ರೀತಿ ಮುಂದೊಂದು ದಿನ
ಹಸಿವಿನ ಸಿಡಿಲಿಗೆ ಸಿಕ್ಕು ಬಲಿಯಾಗದಂತೆ..
ಬಡತನದ ಪ್ರೀತಿಯರಮನೆಯ ಪಟ್ಟಕೆ
ನಿನ್ನ ನಾ ರಾಣಿಯನ್ನಾಗಿ ಮಾಡಲಾರೆ

ಬರುವೆ ನಾ ಮರಳಿ ಕಾಯುವೆಯಾ ಹುಡುಗಿ