ಕೂಗಿ ನೋಡು

ಕೂಗಿ ನೋಡು ಒಮ್ಮೆ
ನಾನೀಲ್ಲೆ ಇರುವೆ ಈ ದಂಡೆಯ
ತುದಿಯಲ್ಲಿ...ನಿನ್ನ ನೆನಪಿನ ಕೊರಗಲಿ
ಮನದ ಮಡಿಕೆಯಿದು ಅತ್ತು.. ಅತ್ತು
ಬರಿದಾಗಿಬಿಟ್ಟಿದೆ...

ಕರಗಿಸಿಬಿಡು ನಿನ್ನ ಮನದ ಹೆಪ್ಪನು
ತುಂಬಿಸಿಬಿಡು ನಿನ್ನೆಲ್ಲ ದುಃಖವನು
ಭರಿಸುವೆನು ನಾನೆಲ್ಲ ನಿನ್ನ ನೋವನು
ಅತ್ತುಬಿಡು ಬಿಟ್ಟು ಬಿಡದ ಹಾಗೆ ನನ್ನೆದೆಯ
ಮೇಲೆ ನಿನ್ನ ಮಡುವುಗಟ್ಟಿದ ಮೊಗವನಿಟ್ಟು

ಬಿಟ್ಟು ಬಂದ ನೆನಪುಗಳನೆಲ್ಲವ ನೆನೆದು
ನೆನೆದು ದುಃಖಿಸಬೇಡ... ನನ್ನೊಲವಿನ
ಮಾತುಗಳ ಕೇಳದೆ ನೀನೆಡವಿದ ಕ್ಷಣಗಳ
ಕೆದಕಿ ಕೆದಕಿ ಕೊರಗಬೇಡ.. ಹರಿಯುವ
ಹಳ್ಳವದು.. ನಿನ್ನ ಕಣ್ಣಂಚಿಂದ ಜಾರಿದ
ಮುತ್ತುಗಳ ಅದೇಷ್ಟು ಲೆಕ್ಕವಿಟ್ಟಾತು...
ಆ ಮುತ್ತುಗಳ ಬೆಲೆ ಅದಕ್ಕೆನಾದರೂ
ಗೊತ್ತಾದಿತು...

ತೂರಿಬಿಡು ನಿನ್ನ ಮನದ ದುಗುಡಗಳನ್ನೆಲ್ಲವ
ಹಾರಿ ಹಾರಿ ಮೋಡದೊಡಲ ಸೇರಿ.. ಸುರಿಸಲಿ
ಮಳೆ ಹನಿಗಳ ನಮ್ಮಿಬ್ಬರ ಮರು ಮಿಲನಕೆ...
ಕೂಡಿದ ಸಾಕ್ಷಿಗೆ ನಿನ್ನ ಕೆನ್ನೆಯು ರಂಗೇರುವುದು..
ನಮ್ಮಿಬ್ಬರೊಲವಿಗೆ ಸುರಿದ ಮಳೆ ಹನಿಗಳ ಸಾಕ್ಷಿಗೆ
ಬಾನಿನ ಬಿಲ್ಲು ಮೂಡಿ  ನಾಚುವುದು