ಅರಿಯೆ ಏನೊ...?

ನಾನಾರೆಂದು ನೀನರಿಯದೆ ಹೋದೆಯೆ..?
ಕಣ್ಣ ಕೊಳದಲ್ಲಿ ಈಜು ಬಾರದೆಂದು ಸತಾಯಿಸಿದವನು....
ಕಟ್ಟಿದ ತುರುಬನು ಬಿಚ್ಚಿ...ಹರಡಿದ ಮುಂಗುರುಳ
ಮೂಸಿ ಮನಸೋತು,
ಜಡೆತುಂಬಾ ಮಲ್ಲಿಗೆಯ ಮುಡಿಸಿದವನೆ..
ಏಳು ಮಡಿಕೆಯ ಇಳಕಲ್ ಸೀರೆಯ
ತಂದುಡಿಸಿದವನೆ...
ಕಲ್ಲೆದೆಯಲೂ... ಹೂವರಳಿಸುವ
ಜಾದುಗಾರನೆ... ಅರಿವಾಗಲಿಲ್ಲವೆ
ನಿನಗಿಂದು

ನನ್ನ ಕಾಯಿಸುವಿಕೆಯಲ್ಲಿ ನಿನಗದೇಷ್ಟು
ಸುಖವೊ....ದೊರೆಯೆ
ಕೊಳದ ಮೇಲಣ ಸುಳಿದು ಬಂದ
ತಂಗಾಳಿಯೂ... ಸುಡುತಿಹುದು ಸಖನೆ...
ವಿರಹದ ಕಾವಿಗೆ ಸಿಕ್ಕು ಕುದ್ದು...ಕುದ್ದು..
ಉಕ್ಕೇರಿ ಹೊತ್ತಿ ಹೋಗುವ ಮುನ್ನ ...
ಬಂಧಿಸು ಬಾರೋ ತಂಪೆರಿಸೊ... ಆ
ತೋಳ್ಬಂಧನದಲಿ...

ಒಣಗಿಸಬೇಡ ಒಲವಿನಾಸೆಗಳ
ಭೋರ್ಗರೆದಾದರೂ...ಬಾ.. ತುಂತುರು
ಹನಿಗಳ ಸಿಂಚನಗೈಯುತವಾದರೂ...ಬಾ...
ನೆನಪುಗಳ ಬಿಸಿಗೆ ಬಳಲಿ ಬೆಂಗಾಡಾಗಿರುವ
ತನುವಣುವಣುವನು ನೀ.... ತಣಿಸು.. ಬಾ...