ಅಪ್ಪ

ಎರಡು ತಾಸು ತನ್ನ ಹೆಗಲ ಮೇಲೆ
ಹೊತ್ತುಕೊಂಡು ಬಯಲು ನಾಟಕವ
ತೋರಿಸಿದಾತ..
ಸೈಕಲ್ ಬಂಪರ್ ಮೇಲೆ ಟವೆಲ್ ಹಾಕಿ
ಕುಳ್ಳರಿಸಿಕೊಂಡು ದವಾಖಾನೆಗೆ ಕರೆದುಕೊಂಡು
ಹೋಗಿ ನನ್ನೆರಡು ಕೈ ಕಾಲುಗಳ ಗಟ್ಟಿಯಾಗಿ ಹಿಡಿದು ಸೂಜಿಯನು ಚುಚ್ಚಿಸಿದಾತ..
ಶಾಲೆಗೆ ಹೋಗದ ಬೆನ್ನಿಗೆ ಬಾಸುಂಡೆಗಳ
ಬರೆಸಿದಾತ...
ನೊಂದು.. ಶಾಲೆಯ ಹತ್ತಿರ ಬಂದು ವಾಟೆಯ
ತುಂಬ ಹಾಲು ತಂದು ಕೊಟ್ಟಾತ..
ಹತ್ತು ದಿನದ ಎನ್ ಎಸ್ ಎಸ್ ಕ್ಯಾಂಪ್ ಗೆ
ಹೋದಾಗ.. ಎರಡೆ ದಿನಕ್ಕೆ ಇಪ್ಪತ್ತು ಪುರಿ
ಚಟ್ನಿಯ ತಂದು ಕೊಟ್ಟು ಮಾತಾಡಿಸಿದಾತ..
ಹೊಲದಲ್ಲಿ ಬಿಸಿಲ ತಾಪ ನನಗಾಗದೆಂದು
ಬೇವಿನ ಮರದಡಿಯಲ್ಲಿ ಬಲವಂತವಾಗಿ
ಕುಳ್ಳರಿಸಿ ತಾ ದುಡಿಯುವಾತ..
ಟೈಫಾಯ್ಡ ಆದಾಗ... ತನ್ನ ಅಂಗಡಿಯ ಕೆಲಸದಲ್ಲೂ
ಹಗಲಿರುಳು ನನ್ನ ಆರೈಕೆಯ ಮಾಡಿದಾತ
ಸಿಡಿಲು ಬಡಿದು ಕೂದಲೆಳೆಯಲಿ ಪಾರಾದ
ನನ್ನೆದುರು ಎರಡು ದಿನ ಕೈ ಹಿಡಿದುಕೊಂಡೆ
ಕುಳಿತಾತ....
ಅಪ್ಪ.. ನಿನ್ನೊಲವಿಂದಲೆ ಈ ಬದುಕಪ್ಪ