ಅರಿವಿಲ್ಲದಂತೆ

ಮೂಡಣದಿ ಮೂಡಿದ ರವಿಯು
ಕಗ್ಗತ್ತಲಿನ ಚಂದಿರನಿಗೆ ಹಾಜರಿ
ಹಾಕುವವರೆಗೂ... ಶಶಿಯು ಮತ್ತೆ
ಹೊಂಬೆಳಕಿನ ದಿನಕರನಿಗೆ ಹಾಜರಿಯ
ಹಾಕುವವರೆಗೂ..‌

ಈ ತೋಳಲಿ ಉಳಿದುಬಿಡು ಗೆಳತಿ
ಇನ್ನೊಂದು ಅರೆ ಘಳಿಗೆ

ಲತೆಯಲಿ ಮೊಗ್ಗರಳಿ.. ಮೊಗ್ಗುಗಳು
ಸುಮವಾಗಿ.. ಸುಮಗಳು ಗಂಧವ
ಸೂಸಿ...ಗಂಧವ ದುಂಬಿಯು ಹೀರಿ
ಸಂಜೆಗೆ ನಲುಗಿ ಹೂವು ಉದುರುವ
ವರೆಗಾದರೂ...

ಈ ತೋಳಲಿ ಉಳಿದುಬಿಡು ಗೆಳತಿ
ಇನ್ನೊಂದು ಅರೆ ಘಳಿಗೆ

ನಾ ಮುಡಿಸಿದ ಮಲ್ಲಿಗೆಯ
ಘಮವು ಮಾಸುವವರೆಗಾದರೂ
ನಿನಗೆ ಹೇಳುವ ಮನದ ಮಾತುಗಳು
ಮುಗಿಯುವವರೆಗಾದರೂ
ನೀ ಕೊಟ್ಟ ಈ ಕೆನ್ನೆಗೆ ಮುತ್ತಿನ
ಮತ್ತು ಇಳಿಯುವವರೆಗಾದರೂ

ಈ ತೋಳಲಿ ಮಲಗಿಬಿಡು ಗೆಳತಿ
ಜಗದ ಪರಿವಿಲ್ಲದಂತೆ...
ಘಳಿಗೆ ಅರೆ ಘಳಿಗೆಗಳ
ಅರಿವಿಲ್ಲದಂತೆ