ನಮ್ಮವ್ವ

ಕನ್ಯೆ ನೋಡೊ ಮುಂದ

ಹುಡ್ಗಿ ಬಂಗಾರ..ಬಂಗಾರ

ಆಗೀರ್ಬೆಕು ಅಂತಿರ್ತಾರ

ನೋಡವ್ವ...

ಬಂಗಾರದಂತ ಹುಡ್ಗಿ

ಸಿಕ್ಕ ಮ್ಯಾಲ, ಕಬ್ಬಿಣ್ದಂಗ

ಕಾಸಿ...ಕಾಸಿ ಬಡಿತಾರಲ್ಲೊ

ನಮ್ಮವ್ವ.

ಹುಡ್ಗಿ ಲಕ್ಷ್ಮೀ ಇದ್ದಂಗಿರ್ಲಿ

ಅಂತಂದ, ಮೈ ತುಂಬಾ ಲಕ್ಷ್ಮೀ

ಹಾಕ್ಕೊಂಡಕ್ಕಿನ ಮನಿ

ತುಂಬ್ಸಕೋತಾರು

ನೋಡವ್ವಾ...

ನಡೆಯೊ ಮುಂದ

ಲಕ್ಷ್ಮೀ ಕಟಾಕ್ಷ ಚೂರ

ಕಮ್ಮ್ಯಾದ್ರ...ಹಟ್ಟಿ 

ಹೊಸ್ತಲಾನ ದಾಟಿಸಿ

ಬಿಡ್ತಾರಲ್ಲೊ ನಮ್ಮವ್ವ

ಹೆಣ್ಣಿನ ಕಣ್ಣೀರ್ಗೆ

ಬೆಲೆ ಐತಿ ಅಂದಾರು,

ನ್ಯಾಯದ ತಕ್ಕಡ್ಯಾಗಿಟ್ಟು

ತೂಗಿ ನೋಡೊರಾದ್ರು

ಯಾರವ್ವ...

ಆಕಿ ಎದಿ ಮ್ಯಾಲಿನ

ಸೆರ್ಗ ಎಳಿಯೊರದಾರು...

ಮನಸ್ಸನ್ನ ಅರಿಯೊರು

ಯಾರ ಅದಾರೊ ನಮ್ಮವ್ವ