ಕುಡುಕು ಗಂಡ

ಗಂಡು ಮದುವೆಯಾದ ಮೇಲೆ
ಕುಡುಕನಾಗುತ್ತಾನೊ.... ಮದುವೆಗೆ
ಮುಂಚೆಯೆ ಕುಡಿಯುತ್ತಿರುತ್ತಾನೊ... ಯಾರಿಗೆ
ಗೊತ್ತು.. ನೀರಲ್ಲಿ ಇಳಿದ ಮೇಲೆ ತಾನೆ ಅದರ
ಆಳ ತಿಳಿಯಾಗುವುದು.. ಗಂಡನೆಂಬುವನು
ಕುಡಿದು ತೂರಾಡಿ ಬಂದ ಮೇಲೆ ತಾನೆ...
ಅವನ ಯೋಗ್ಯತೆಯ ಅರಿವಾಗುವುದು...

ಮುಪ್ಪು ವಯಸ್ಸಿನ ತಂದೆ ತಾಯಿಗಳು..
ಈ ಕಣ್ಣೀದ್ದರೂ ಕುರುಡಂತಾಗಿರುವ ಸಮಾಜದಲ್ಲಿ
ಹರೆಯಕ್ಕೆ ಬಂದ ಹೆಣ್ಣು ಮಗಳನ್ನು ಎಷ್ಟು ದಿವಸವೆಂದು
ಮಡಿಲ ಕೆಂಡವನ್ನಾಗಿ ಇಟ್ಟುಕೊಳ್ಳುವರು...ಎಷ್ಟೊ
ತಮ್ಮ ಶಕ್ತಿ ಮೀರಿ... ಕೈಲಾದಷ್ಟು ಕೊಟ್ಟು ಒಂದು
ಗಂಡಿಗೆ ಮಗಳನ್ನು ಧಾರೆ ಎರೆದು ಕೊಡುತ್ತಾರೆ...
ಅವಳ ಬಾಳು ಹಸನಾಗಲೆಂದು ಹಾರೈಸುತ್ತಾರೆ..

ಗಂಡ ಮೊದ ಮೊದಲು ಚೆನ್ನಾಗಿಯೇ ಇದ್ದು...
ಎರಡು ಮಕ್ಕಳನ್ನು ಹಡೆದು... ನಿಧಾನವಾಗಿ
ಸಂಜೆಯಾಗುತ್ತಲೆ ಸ್ವಲ್ಪ ಕುಡಿದು ಬರುವುದು.. ಹೆಂಡತಿಯಾದವಳು ಅದನ್ನು ಪ್ರತಿಭಟಿಸದಿದ್ದರೆ..
ಇನ್ನೂ ಹೆಚ್ಚು ಹೆಚ್ಚು ಕುಡಿದು ಬರುವುದು..ಕುಡಿತಕ್ಕೆ
ಹಣವು ಸಾಲದಿದ್ದರೆ ಒಡವೆ ವಸ್ತ್ರಗಳನ್ನು ಮಾರಿ
ಕುಡಿಯುವುದು ಕುಡಿದ ಮತ್ತಿನಲ್ಲಿ.. ಮಡದಿ ಮಕ್ಕಳೆನ್ನದೆ
ಚೆನ್ನಾಗಿ ಹೊಡೆದು ಬಡೆದು ಅವರ ದೇಹವ ಹಣ್ಣಾಗಿಸುವುದು
ಆಗ... ಅವಳಿಗನಿಸುವುದೇನೊ... ಒಂದು ನನ್ನನ್ನು
ಯಾಕಾದರೂ... ಹೆಣ್ಣಾಗಿ ಹುಟ್ಟಿಸಿದೇಯೊ ದೇವರೆ..
ಇನ್ನೊಂದು... ಮೂರು ಹೊತ್ತು ಕೂಳಿಲ್ಲದ ಮನೆಗೆ
ಕೊಟ್ಟಿದ್ದರು ಪರ್ವಾಗಿಲ್ಲ... ಇಂತಹ ಕುಡುಕು ಗಂಡನ
ತಾಳಿಗೆ ನನ್ನನ್ನೇಕೆ ಕುರಿಯಾಗಿಸಿದೇಯೊ...

ಸಹೋದರಿಯರೆ... ಗೃಹಿಣಿಯರೆ..ಇಂದಿನ
ದಿನಮಾನದಲ್ಲಿ ನಿಮಗೆ ಸೋಲೆಂಬುದೆ ಇಲ್ಲ.. ಬನ್ನಿ
ಬೀದಿಗೆ.. ಸುದ್ದಿವಾಹಿನಿಗಳ.. ಮಾಧ್ಯಮಗಳ ಸಹಾಯದಿಂದ
ನಿಮ್ಮೂರಲ್ಲಿ ಬೇರೂರಿರುವ ಸುರೆಯ ಅಂಗಡಿಗಳ ಬಾಗಿಲವ
ಮುಚ್ಚಿಸಿ.. ಕುಡಿದು ಎಡವಿ ಬಿದ್ದು ಸಾಯುವ.. ಜೀವಂತವಿದ್ದು
ಹೆಂಡತಿ ಮಕ್ಕಳು ಅನಾಥ ಪ್ರಜ್ಞೆಯಲ್ಲಿ ಬಾಳುವಂತೆ
ಮಾಡುವ.. ಹೆತ್ತ ತಂದೆ ತಾಯಿಗಳನ್ನು ಕುಡಿದ ಮತ್ತಿನಲ್ಲಿ ಮನೆಯಿಂದ ಹೊರ ಹಾಕುವ ಮಕ್ಕಳನ್ನು..ಗಂಡಂದಿರನ್ನು... ಸಹೋದರರನ್ನು... ಇಂತಹ ಕೂಪದಿಂದ ಎಳೆದು ತರಬೇಕಿದೆ
ಮನೆಗೆ.. ನಾಡಿಗೆ.. ರಾಷ್ಟ್ರಕ್ಕೆ ಏನಾದರೂ ಒಂದು
ಕೊಡುಗೆಯ ನೀಡುವ ನಾಗರಿಕರನ್ನಾಗಿಸಿ...

ನಾರಿ ನೀನಾಗದಿದ್ದರೆ ಕಾಳಿ..
ಉಳಿಯಬಲ್ಲದೆ ನಿನ್ನ ಕೊರಳ ತಾಳಿ...